बेतहनी स्वास्थ्य चौकी जग्गादाताको प्रतिमा अनवरण

डुडुवा – बाँके डुडुवा गाउँपालिका वार्ड नं. २ स्थित बेतहानी स्वास्थ्य चौकी भवन निर्माणका लागि जग्गादाताको नवनिर्मित प्रतिमाको अनावरण गरिएको छ ।
वार्ड नंं २ बेतहानी निवासी भुतपूर्व प्रधान स्व. विष्णुप्रसाद चौधरी र श्रीमती लिलावती चौधरीले स्वास्थ्य चौकी भवन निर्माणका लागि विक्रम सम्मत २०६५ सालमा सात कठ्ठा जग्गा दान गर्नुभएको थियो । जग्गा प्राप्त भएपछि नेपाल सरकारले आर्थिक वर्ष २०७३-०७४ मा सुविधा सम्पन्न भवन निर्माण गरेको थियो ।
गाउँपालिका अध्यक्ष नरेन्द्रकुमार चौधरीले शुक्रबार एक कार्यक्रमका विच जग्गादाताको प्रतिमा अनवरण गर्दै उहाँले स्वास्थ्य जस्तो सम्बेदनशील सेवाका लागि गरेको महादानी जग्गादाताको सम्मानका लागि प्रतिमा स्थापना गरेको बताउनुभयो । उहाँले यो लाखौ मुल्य पर्ने ठूलो दानले यस क्षेत्रका नागरिकहरुलाई स्वास्थ्य सेवा लिनबाट सहयोग पुगेको भन्दै समाजसेवा गर्नेहरुको सम्झनाका लागि पनि हामीले सधै सम्मान गर्न सिक्नुपर्ने कुरा उल्लेख गर्नुभयो ।
त्यस अवसरमा जग्गदाताका परिवारलाई सम्मान पनि गरिएको थियो । जग्गादाताका छोरा ओमप्रकाश चौधरी र शिवकुमार चौधरी र बुहारी सुरतादेबी चौधरीलाई अध्यक्ष चौधरीले फुल माला लगाएर सम्मान गर्नुभएको थियो ।
स्वास्थ्य चौकी निर्माण भएपछि डुडुवा १ होलिया, २ बेतहानी र ३ बनकट्टी लगायत आसपास गाउँका नागरिकलाई स्वास्थ्य सेवा लिन सहज भएको छ । बेतहनी स्वास्थ्य चौकीमा अहिले जेष्ठ नागरिक सहायता उपचार केन्द्र, निशुल्क प्रयोगशाला, औषधी भण्डारण, एम्बुलेन्स परिचालनको सेवा उपलब्ध रहेको गाउँपालिका स्वास्थ्य शाखा प्रमुख धनबहादुर बुढाले बताउनुभयो ।