ओलीले विमानस्थलमै लखेरलाई पार्टी प्रवेश गराए
नेपालगञ्ज – नेकपा एमालेका अध्यक्ष केपी शर्मा ओलीले नेपालगञ्ज विमानस्थलमै केही व्यक्तिलाई पार्टी प्रवेश गरेका छन् ।
नेपाल सुन चाँदी व्यवसायी संघका उपाध्यक्ष सन्तोषकुमार लखेरलगायतलाई अध्यक्ष ओलीले विमानस्थलमै पार्टी प्रवेश गराएका हुन् ।
जुम्ला र कालिकोट जाने क्रममा बुधबार साँझ नेपालगञ्ज आइपुगेका अध्यक्ष ओलीले आउँदा आउँदै नेपालगञ्जका लखेरलगायतलाई पार्टी प्रवेश गराउनुभयो । नेपालगञ्जको त्रिभुवनचोक आसपासमा बसोबास रहेको लखेर समुदायमा सन्तोष चर्चित छन् ।
पार्टी अध्यक्ष ओली नेपालगञ्जस्थित स्नेह होटलमा बस्नु भएको छ । जिल्लामा रहेका नेताहरुले भेटघाट गरेका छन् । युवा नेता रविन्द्र लम्सालले ओली बिहीबार जुम्ला र कालिकोटको कार्यक्रममा जाने जानकारी दिनुभयो ।
