नेपालगञ्जमा हात्तीपाइलेविरुद्ध विशेष अभियान

नेपालगञ्ज – नेपालगञ्ज उपमहानगरपालिकाले हात्तीपाइले रोगविरुद्धको औषधी बढि भन्दा बढि नागरिकलाई सेवन गराउनका लागि विशेष अभियान सञ्चालन गर्ने भएको छ ।
उपप्रमुख उमा थापा मगरको अध्यक्षतामा सोमबार भएको स्थानीय तह स्तरीय योजना तथा वहुनिकाय गोष्ठीले हात्तीपाइले रोग निवारण कार्यक्रम आम औषधी सेवन अभियान–२०७७ लाई सफल पार्न हात्तीपाइले रोगविरुद्धको औषधी सेवन कम भएका वडामा विशेष अभियान सञ्चालन गर्ने निर्णय भएको हो ।
उपप्रमुख मगरले विशेष योजनासहित वडास्तरमा जान स्वास्थ्य शाखालाई आग्रह गर्नुभयो । उहाँले अभियानको सफलताका लागि राजनीतिक दल, धर्मगुरु, नागरिक समाजका अगुवालगायत सबैको साथ आवश्यक भएको बताउनुभयो । उपमहानगरपालिकाका प्रबक्ता प्रमोद रिजालले बढि भन्दा बढि हात्तीपाइले रोगविरुद्धको औषधी सेवनका लागि वडास्तरदेखि विशेष कार्यक्रमलाई जोड दिइने बताउनुभयो ।
स्वास्थ्य कार्यालय बाँकेका बरिष्ठ जनस्वास्थ्य अधिकृत सुनिता पौडेलले हात्तीपाइले रोग निवारणका लागि हरेक वडामा ६५ प्रतिशत भन्दा बढि सेवन गर्नेहरु हुनुपर्ने बताउनुभयो ।
नेपालगञ्ज उपमहानगरपालिका स्वास्थ्य शाखा प्रमुख रामवहादुर चन्दले फागुन २९ देखि सञ्चालन हुने अभियानमा यसपटक नगरका २३ वटा वडालाई विभिन्न क्लष्टरमा विभाजित गरि कार्यक्रम प्रभावकारी बनाउन लागिएको बताउनुभयो । नेपालगञ्जमा यसपटक एकलाख ४९ हजार ९२ जनालाई औषधी खुवाउने लक्ष्य राखिएको छ ।