प्रचण्डमात्रै आउने

नेपालगञ्ज – नेकपाका अध्यक्ष प्रचण्ड प्रशिक्षण दिन आज कोहलपुर आउदै हुनुहुन्छ । पार्टीले आयोजना गरेको देशव्यापी विशेष अभियानअन्तर्गत भेला र प्रशिक्षणका लागि अध्यक्ष प्रचण्ड कोहलपुर आउन थाल्नु भएको हो ।
प्रधानमन्त्री एवं अर्का पार्टी अध्यक्ष केपी शर्मा ओली पनि आउने कार्यक्रम बनाइएपनि उहाँ नआउने जिल्ला नेताहरुले बताएका छन् । नेकपाका जिल्ला अध्यक्ष आइपी खरेलले प्रधानमन्त्री नआउने बताउनुभयो । प्रशिक्षण र भेलाका लागि महासचिव विष्णु पौडेल, गृहमन्त्री रामबहादुर थापा बादल पनि कोहलपुर आउदै हुनुहुन्छ ।
बैठकले कोहलपुरमा भेला र प्रशिक्षण गर्ने, ५ गते प्रदेशका लागि ३ महिने अभियानको खाका तयार गर्ने, फागुनमा जिल्ला तहदेखि तल्लो तहसम्मका पार्टीका बैठक गर्ने, जनसंगठन निर्माण गर्ने, चैतमा सर्वसाधारण र कार्यकर्ताबाट सुझाव संकलन गर्ने, तीन तहकै सरकारको कामको समिक्षा गर्ने, प्रचारप्रसार गर्ने र बैशाखमा बृहत जनसभा गर्ने पार्टीको तयारी रहेको छ ।
भेला एवं प्रशिक्षणमा आएका नेताहरुलाई कार्यकर्ताहरुको घरघरमा बस्ने व्यवस्था मिलाइएको जिल्ला नेताहरुले बताएका छन् । ५ नम्बर प्रदेशभरीका तीन हजार नेता एवं कार्यकर्ता भेला एवं प्रशिक्षणमा सहभागी हुने बताइएको छ ।