१५ ग्राम ब्राउनसुगरसहित रोका पक्राउ

नेपालगञ्ज – बाँके प्रहरीले १५ ग्राम ६ सय मिलिग्राम ब्राउनसुगरसहित मानबहादुर रोकालाई पक्राउ गरेको छ ।
सीमावर्ती भारतीय बजार रुपैडिहाबाट नेपालगञ्ज प्रवेश गरेका काभ्रेपलान्चोक महादेवस्थानका रोकालाई प्रहरीले खानतलासी गर्दा ब्राउनसुगर बरामद भएको हो । जमुनाहा नाकामा रहेको लागु औषध नियन्त्रण ब्यूरो र प्रहरीको संयुक्त जाँचले रोकालाई पक्राउ गरेको थियो ।
नेपालगञ्ज आइरहेका रोकालाई शंका लागेपछि प्रहरीले चेक गरेको थियो । उनका बारेमा आवश्यक अनुसन्धान भइरहेको प्रहरीले जनाएको छ ।
यसैबीच, कोहलपुर प्रहरीले तीन लाख उनन्पचास हजार सात रुपैयासहित ६ जना जुवाडेलाई नियन्त्रणमा लिएको छ । कोहलपुर नगरपालिका वडा नं. ८, पिपरीस्थित रुद्रवीर खड्काको घरमा जुवा खेलिरहेका उनीहरुलाई प्रहरीले नियन्त्रणमा लिएको हो ।