मोबाइल पसलमा चोरी

नेपालगञ्ज – नेपालगञ्जको पुष्पलालचोकस्थित मोबाइल पसलमा चोरी भएको छ ।
गएराती साढे एक बजेतिर बसपार्क रोडमा रहेको गौतम इलेक्ट्रोनिक्स एण्ड मोबाइल सप्लायर्समा चोरी भएको हो ।
नजिकै रहेको सीसी टिभीमा तीन जना चोर देखिएका छन् । पसलबाट मोबाइल निकालेपछि उनीहरु बोरा बोकेर पुष्पलालचोकतिर गएको देखिएको छ । सटरको ताला, सेन्ट्रल लक गरिएको थियो । चोरले ताला फोरेर, सेन्ट्रल लकलाई जग लगाएर खन्ती, लिबरले च्यातेको छ ।
पसलबाट ५५ वटा स्मार्ट मोबाइल चोरी भएको छ । गौतम इलेक्ट्रोनिक्स एण्ड मोबाइल सप्लायर्स थोकबिक्रेता पसल हो ।
बाँके प्रहरी प्रवक्ता मधुसुदन न्यौपानेले मोबाइल पसलमा चोरी भएको र त्यहाँ प्रहरी पुगेर अनुसन्धान शुरु गरिरकेको जानकारी दिनुभयो । ‘हामीले खोजतलास शुरु गरिसकेका छौं, प्रवक्ता न्यौपानेले भन्नुभयो ।
नेपालगञ्ज उद्योग बाणिज्य संघका महासचिव एवं मोबाइल पसल व्यवसायी चिरन्जीवी वलीले चोरले मोबाइल बेच्न ल्याउन सक्ने भएकाले सबै व्यवसायीलाई चनाखो हुन आग्रह गर्नु भएको छ । उहाँले मोबाइल बेच्न ल्याउने शंकास्पदलाई प्रहरीलाई खबर गरिदिन अनुरोध गर्नुभयो ।