वडा प्रहरीको टोली कोरोनामुक्त

नेपालगञ्ज – कोरोना लागेका ठूलो संख्याका प्रहरी आज डिस्चार्ज भएका छन् ।
वडा प्रहरी कार्यालय, नेपालगञ्जका इन्चार्जसहित २९ जनालाई एकैपटक कोरोना देखिएपछि कार्यालय सील गरिएको थियो । वडा प्रहरी कार्यालयमा लिइएका स्वावमा पछि केहीलाई पोजिटिभ देखिएको थियो ।
जिल्ला स्वास्थ्य कार्यालय, बाँकेका अधिकृत एवं कोरोनाका फोकलपर्सन नरेश श्रेष्ठका अनुसार, आइतबार ठूलो संख्याका प्रहरीसहित ४६ जना डिस्चार्ज भएका छन् । उनीहरु वडा प्रहरी कार्यालय, खुल्ला कारागार, इन्द्रेणी होटल, खजुरास्थित कोरोना विशेष अस्पतालमा बसेका थिए ।
फोकलपर्सन श्रेष्ठले अहिलेसम्म ६ सय १४ जना डिस्चार्ज भएको जानकारी दिनुभयो । आइसोलेसनमा २ सय ३ जना रहेका छन् ।