जुमाको दोस्रो वार्षिकोत्सवमा फुटसल

नेपालगञ्ज – जुमा स्पोर्टस क्लवले आफ्नो दोस्रो वार्षिकोत्सवको अवसरमा फुटसल प्रतियोगिता गराएको छ ।
व्यवसायीलाई फुटबलमा जोड्ने उद्देश्यले जन्मिएको जुमाले दोस्रो वार्षिकोत्सवमा आफ्नै सदस्यहरुका बीचमा फुटसल प्रतियोगिता गराएको हो । चार वटा टीम बनाएर प्रतियोगिता गराइएको थियो । बागेश्वरी, लुम्बिनी, सुपादेउराली र स्वर्गद्वारी नाम दिएर गराइएको प्रतियोगितामा सुपादेउराली प्रथम भएको छ । स्वर्गद्वारी द्वितिय भएको छ । सुपादेउराली ४–२ गोल अन्तरले विजयी भएको हो । जबकी शुरुवातमा सुपादेउराली गोल अन्तरमा पछि परेको थियो ।

विजेता टीमलाई प्रदेश सांसद कृष्णा केसी नमुनाले पुरस्कार दिनुभयो । विजेतालाई पाँच हजार एक सय र द्वितियलाई दुई हजार पाँच सय रुपैयासहित ट्रफी दिइएको थियो । प्रतियोगिताको उत्कृष्ट खेलाडी सूर्यमणि अधिकारी र उत्कृष्ट किपर बासु पौडेल भए ।
फुटसलको समापन समारोहमा मध्यपश्चिम खेलकुद विकास समितिका पूर्वअध्यक्ष भीम वली, व्यापारी अगुवाहरु कृष्णप्रसाद श्रेष्ठ, भाष्कर काफ्ले, सञ्जय थापा, तारा रोकाय, वरिष्ठ पत्रकार पूर्णलाल चुके, अधिवक्ता विकास आचार्य, फुटबलका प्रदेश प्रशिक्षक जनक केसीलगायतको सहभागिता रहेको जुमाका अध्यक्ष भीम रानाभाटले जानकारी दिनुभयो । दोस्रो वार्षिकोत्सवको अवसरमा केक काटिएको थियो ।