बाँकेको खजुरामा धार्मिक महोत्सव हुने

नेपालगञ्ज – बाँकेको खजुरा-४, एफगाउँमा रहेको किरण भवानी मन्दिरमा धार्मिक महोत्सव आयोजना गरिने भएको छ ।

सदिऔं पुरानो मन्दिरको ब्यवस्थापनका लागि बाँके, खजुरा धार्मिक महामहोत्सवको आयोजना गर्न लागिएको हो ।

भदौं ३० गतेदेखि सुरु हुने महोत्सव असोज ६ गतेसम्म सञ्चालन हुनेछ । महोत्सवका लागि आइतबार भएको स्थानीयको भेलाले मूल समितिलाई पूर्णता दिएको छ । स्थानीयबासीको वृहद भेलाले खड्क वलीको संयोजकत्वमा मूल समिति गठन गरेको छ ।

समितिमा खजुरा गाउँपालिका वडा नम्बर ४ का सबै टोल, जानकी, कोहलपुर र बैजनाथ गाउँपालिकाबाट समेत प्रतिनिधित्व रहेको छ ।

अध्यक्ष वलीका अनुसार सोमबारदेखि महोत्सवको सदस्यताका लागि प्रचारात्मक अभियान चलाइने भएको छ । करिब एक विगाह क्षेत्रफलमा रहेको मन्दिरलाई धार्मिक पर्यटकीय क्षेत्रको रुपमा विकास गर्ने समितिको योजना रहेको छ ।