बाँकेमा फेरि कोरोना ग्राफ उकालो

नेपालगञ्ज – बाँकेमा फेरि कोरोना ग्राफ उकालो लाग्दै गएको छ । सक्रिय संक्रमितको संख्या ३५ जनामा झरेको बाँकेमा फेरि बढेको हो । अहिले सक्रिय संक्रमितको संख्या एक सय १६ जना पुगेको छ । भेरी अस्पतालमा साउन ५ गते १८ जना विरामी संख्या थियो । अहिले ४८ जनाको उपचार भइरहेको छ ।
बिहीबारमात्रै जिल्लामा ३१ जना संक्रमित थपिएका छन् । त्यसमध्येमा बाँके निवासी २३ जना छन् । बाँकेमा पनि कोहलपुर नगरपालिकाका २१ जना रहेका छन् । नेपालगञ्ज उपमहानगरपालिका र राप्तीसोनारी गाउँपालिकाका एक÷एक जना रहेका छन् ।
जिल्ला कोभिड व्यवस्थापन केन्द्रका फोकलपर्सन तेजबहादुर वलीले जिल्लाका तीन वटा ल्याबमा एक सय ८८ जनाको परीक्षण गर्दा ३१ जनामा कोरोना पुष्टि भएको बतउानुभयो । उहाँका अनुसार, भेरी अस्पतालमा सय जनाको परीक्षण गर्दा २० जना, कोहलपुर मेडिकल कलेजमा ५९ जनामा ७ जना र बागेश्वरी ल्याबमा २९ जनाको परीक्षण गर्दा चार जनामा कोरोना पुष्टि भएको हो ।
अस्पतालहरुमा १५ जना सिकिस्त, ३३ जना मध्यम र ६ जना भेन्टिलेटरमा रहेका छन् ।
पछिल्लो दिनमा दैनिक नै कोरोना संक्रमित बढ्दै गएपछि प्रमुख जिल्ला अधिकारीको संयोजकत्वमा हुने जिल्ला विपद व्यवस्थापन समितिको बैठक बसेर तत्काल र आगामी रणनीतिका बारेमा छलफल गरिएको छ ।
प्रमुख जिल्ला अधिकारी शिवराम गेलाल, सहायक प्रमुख जिल्ला अधिकारी शंकर विष्ट, नेपालगञ्ज उपमहानगरपालिकाका मेयर डा. धवलशमशेर राणा, कोहलपुर नगरपालिकाका उपप्रमुख सन्जुकुमारी चौधरी, राप्तीसोनारी गाउँपालिकाका अध्यक्ष लाहुराम थारु, खजुरा गाउँपालिकाका उपप्रमुख एकमाया विक, भेरी अस्पतालमा मेसु डा. प्रकाश थापा, स्वास्थ्य कार्यालयका प्रमुख धीरजंग शाह, जनस्वास्थ्य अधिकृत नरेश श्रेष्ठ, कोडिभ फोकलपर्सन तेजबहादुर वली, सुरक्षा निकायका प्रमुखहरुको उपस्थितिमा स्वास्थ्य मापदण्डको पालना, एन्टिजेट जाँच, कन्ट्याक्ट टे«सिङलगायतका बारेमा छलफल गरिएको थियो ।