पाँच महिनाअघि हराएका बच्चा भेटिए

नेपालगञ्ज – पाँच महिनाअघि हराएका बाँकेका तीन बच्चालाई भारतमा फेला पारेर कोहलपुर ल्याइएको छ ।
कोहलपुर नगरपालिका वडा नं. ४, बेलनपुरका नौ वर्षीय रोशन बादी, सात वर्षीय विशाल बादी र पाँच वर्षीया पूजा बादी पाँच महिना अघि हराएका थिए । उनीहरु नेपालगञ्ज, भारतको रुपैडिहा हुँदै बरेली पुगेका थिए ।
रोशन र बिशाल दाजुभाई हुन् । तिनै जना नेपालगञ्जबाट हिड्दै रुपैडिहा पुगेका थिए । रुपैडिहामा कसैले ट्रकमा बसाइदिएको थियो । ट्रकचालकले बरेलु भन्दा दुई किलोमिटर टाढा झारिदिएको थियो । सडकमा हिडिरहेका बच्चालाई महिला विभाग, बरेलीको टोली फेला पारेर अनाथलयमा पठाइदिएको थियो ।

लकडाउनका बेलामा हराएका ती बच्चाको बाँकेमा व्यापक खोजी भएको थियो । विशेष गरेर वडा नं. ४ का वडाध्यक्ष तिरथराम थारु बच्चा खोज्न दौडिएका थिए । वडाध्यक्ष थारु बरेली पुगे । त्यहाँका मेजिस्टेटलाई भेटे । रुपन्देहीको मानव कल्याण मित्र मञ्चको सहयोगमा वडाध्यक्ष थारुले बच्चालाई कोहलपुर लिएर आएका छन् ।
आइतबार राती कोहलपुर आइपुगेका थारुले बच्चालाई अभिभावकको जिम्मा लगाउने तयारी गरेका छन् ।