फरार अभियुक्त पक्राउ

नेपालगञ्ज – बाँके प्रहरीले धमाधम फरार अभियुक्त पक्राउ गरिरहेको छ । यसैक्रममा कर्तब्य ज्यानका फरार अभियुक्त बमबहादुर सार्की प्रहरी फन्दामा परेका छन् ।
खजुरा–६ का प्रेमबहादुर थापाको हत्या अभियोगमा सजाय तोकिएका सार्कीलाई प्रहरीले पक्राउ गरेको हो । सार्कीलाई अदालतले २०७७ कात्तिक २४ गते कर्तब्य ज्यान मुद्दामा दुई महिनाको सजाय सुनाएको थियो । त्यसपछि उनी फरार थिए ।
बाँके प्रहरीले छुट्टै टोली नै खटाएर फरार अभियुक्तलाई पक्राउ अभियान चलाएको छ । प्रहरीले चालु आर्थिक वर्षमा ५ सय ४६ जना फरार अभियुक्तलाई पक्राउ गरेको एसपी ओमबहादुर रानाले जानकारी दिए । एसपी रानाका अनुसार, सय जनाजति अदालतको शरणमै पुगेका छन् । केही व्यक्ति भारतमा लुकेर बसेका छन् । उनीहरुलाई नियन्त्रणमा लिनका लागि भारतीय प्रहरीसँग समन्वय भइरहेको छ ।
सीमावर्ती जिल्ला भएकाले बाँकेमा अपराध गर्ने र भारतमा गएर लुकेर बस्ने गरेको पाइन्छ ।