दुर्घटनामा दुई जनाको मृत्यु

नेपालगञ्ज – पूर्वपश्चिम राजमार्गअन्तर्गत बाँकेको मुगुवा खोला नजिक मोटरसाइकल दुर्घटना हुँदा दुई जनाको मृत्यु भएको छ ।
बिग्रिएर सडकमा रोकिराखेको ना ३ ख ६३९ नम्बरको ट्रकमा ठोक्किदा ना ५५ प ९७५६ नम्बरको मोटरसाइकलमा रहेका दुई जनाको मृत्यु भएको इलाका प्रहरी कार्यालय, कोहलपुरका डीएसपी कुलदिप चन्दले जानकारी दिनुभयो ।
घटना राती साढे दश बजेतिर भएको थियो । दुर्घटना लगत्तै कोहलपुरका डीएसपी चन्द आफै घटनास्थलमा पुग्नु भएको थियो । मोटरसाइकलमा सवार दुवै जना गम्भीर घाइते थिए । उनीहरुलाई उपचारका लागि भेरी अस्पताल ल्याइएको थियो । अस्पताल आइपुग्दा नपुग्दै उनीहरुको मृत्यु भएको थियो ।
दुवै जनाको सनाखत भइसकेको छैन । दुवैको शव भेरी अस्पतालको पोष्टमार्टम गृहमा राखिएको छ ।