छात्रा कलेज सञ्चालनबारे परामर्श

नेपालगञ्ज – प्रस्तावित छात्रा कलेजको भवन निर्माण कार्य अन्तिमचरणमा पुगेपछि नेपालगञ्ज उपमहानगरपालिकाले कलेजको सञ्चालन र व्यवस्थापनबारे परामर्श सुरु गरेको छ ।
नगर प्रमुख डा. धवलशमशेर राणाको अध्यक्षतामा आइतबार राजनीतिक दलका प्रतिनिधि, शिक्षाविद, समाजसेवी, नागरिक समाजका अगुवालगायतसँग कलेजको सञ्चालन र ब्यवस्थापनका सम्बन्धमा छलफल गरिएको हो । सो छलफलबाट मव क्याम्पस नेपालगञ्जका सहप्राध्यापक तथा अधिकारकर्मी रविन्द्र कर्णको संयोजकत्वमा छात्रा कलेजको सञ्चालन र ब्यवस्थापनका सम्बन्धमा आवश्यक अध्ययन गरि प्रतिवेदन पेश गर्न ७ सदस्यीय समिति गठन गरिएको छ ।
नगर प्रमुख राणाले सञ्चालनका सम्बन्धमा विभिन्न प्रस्ताव आएको बताउँदै छात्रा कलेज उपमहानगरपालिका आफैले सञ्चालन गर्ने बताउनुभयो । ‘अहिले पनि नेपालगञ्जमा ठूलो संख्यामा छात्राहरु उच्च शिक्षा पाउनबाट बञ्चित भएको अवस्था छ, नगर प्रमुख राणाले भन्नुभयो, मुस्लिम, मधेसीलगायत सबै समुदायका छात्रालाई गुणस्तरीय शिक्षा प्रदान गर्ने यसको मुख्य उद्देश्य हो ।’ शिक्षामा कुनैपनि कम्प्रोमाइज नहुने भन्दै उहाँले यसलाई मुलुककै उत्कृष्ट शैक्षिक संस्थाको रुपमा विकास गरिने बताउनुभयो ।
प्रदेश सभा सदस्य समेत रहनुभएका नेकपा बाँकेका अध्यक्ष आइपी खरेलले नेपालगञ्जमा स्थापना गर्न लागिएको छात्रा कलेज मुलुककै लागि उदाहरणीय बनाउन सबै पक्षको ध्यान पुग्नुपर्नेमा जोड दिनुभयो । धम्बोझी माविको सफलताबाट पनि नेपालगञ्जमा सरकारी स्तरमा राम्रो कलेज सञ्चालन गर्न सकिन्छ भन्ने उदाहरण भएको उहाँको भनाई छ ।
नेपाली काँग्रेस बाँकेका सभापति किरण कोइरालाले छात्राहरुलाई उच्च शिक्षाका लागि सहज पार्ने उद्देश्यले कलेज स्थापना गर्न लागिएको भन्दै यसलाई विशेष महत्व दिनुपर्नेमा जोड दिनुभयो ।
कार्यक्रममा महेन्द्र बहुमुखी क्याम्पस नेपालगञ्जका प्रमुख लालमणी आचार्य, डा.जनार्दन आचार्य, सहप्राध्यापक अशोक बस्नेत, रविन्द्र कर्ण, सञ्जयराज सिंह, समाजसेवी विजय गुप्ता, राप्रपाका अध्यक्ष नरेन्द्र पौडेल, नेपालगञ्ज उपमहानगरपालिकाका प्रबक्ता प्रमोद रिजाल लगायतले छात्रा कलेज सञ्चालन र ब्यवस्थापनका लागि सुझाव दिनुभयो ।