स्व. महेश थापा मेमोरियल कप फुटसलमा आठ टीम भिड्दै

नेपालगञ्ज – ३१ हजार राशीको स्व. महेश थापा मेमोरियल कप फुटसल प्रतियोगितामा आठ वटा टीमले भाग लिएका छन् ।

आफ्नो दाजुको सम्झनामा फुटबलर मनिष थापाले आयोजना गरेको व्यवसायी र बैकर्स बीचको प्रतियोगितामा अटोमोबाइल्स, किराना पसल, जुत्ता चप्पल, बैकर्स, होलसेलर्स, सुनचाँदी व्यवसायी, एमआर र मेडिकलको टीमले भाग लिएका छन् ।

प्रतियोगिताको शनिबार साँझ टाइसीट बनाइएको छ । जसमा समूह ‘ए’ मा किराना, मेडिकल, होलसेलर्स र अटोमोबाइल्स तथा समूह ‘बी’ मा जुत्ता चप्पल, एमआर, सुनचाँदी र बैकर्सको टीम परेको छ ।

आइतबार राती सात बजे किराना र मेडिकलका बीचमा पहिलो खेल हुनेछ । दोस्रो खेल जुत्ता चप्पल र एमआरका बीचमा हुने भएको छ ।

नेपालगञ्जको न्यूरोडमा रहेको नेपालगञ्ज फुटसल मैदानमा प्रतियोगिता हुँदैछ । प्रतियोगितामा प्रथम हुनेलाई ३१ हजार, ट्रफी, मेडल र सर्टिफिकेट, द्वितिय हुनेले २१ हजार, ट्रफी, मेडल र सर्टिफिकेट पाउने आयोजक मनिष थापाले जानकारी दिनुभयो । प्रतियोगिताको उद्घाटन नेपालगञ्जका पूर्वमेयर डा. धवलशमशेर राणाले उद्घाटन गर्ने कार्यक्रम रहेको छ ।