राप्तीसोनारीमा ८८ करोड ३१ लाखको बजेट ल्याइँदै
राप्तीसोनारी – राप्ती सोनारी गाउँपालिकाको ११ औं गाउँसभा शुक्रबार हुने भएको छ ।
गाउँपालिकाका अध्यक्ष तप्तबहादुर पौडेलले गाउँसभाको तयारीमा जुटिसकेको जानकारी दिनुभयो ।
‘हामी गाउँसभा गर्ने तयारीमा जुटिसकेका छौं, गाउँ सभामा प्रस्तुत गर्ने बजेट बारेको छलफल अन्तिम चरणमा पुगेको छ,’ पौडेलले भन्नुभयो ।
सभामा अध्यक्ष पौडेलले आगामी आर्थिक वर्ष २०७९-८० का लागि नीति तथा कार्यक्रम र उपाध्यक्ष मनिषासिंह थारुले आगामी आर्थिक वर्षको लागि बजेट प्रस्तुत गर्ने कार्यक्रम छ ।
‘गाउँ सभाको तयारीकै लागि हामी निरन्तर कार्यपालिका बैठकमा छौं, कहाँ कति बजेट विनियोजन गर्ने भन्नेबारे कार्यपालिका बैठकमा छलफल भएको छ,’ उपाध्यक्ष थारुले भन्नुभयो ।
गाउँपालिकाका प्रमुख प्रशासकीय अधिकृत सिंहराज डाँगीका अनुसार, आगामी आर्थिक वर्ष २०७९-८० का लागि ९ वटै वडामा १५ करोड ३० लाख रुपैयाको बजेट सिलिङ पठाइएको छ ।
मापदण्ड नै बनाएर वडामा १ करोड ६० लाखदेखि १ करोड ९० लाख रुपैयाँ सम्म बजेट छुट्याइएको छ । यसैगरी गाउँपालिकाले खर्च गर्ने बजेट ३५ करोड ४६ लाख ४८ हजार रुपैयाँ गरी कुल ८८ करोड ३१ लाख ४८ हजार रुपैयाँ बराबरको बजेट ल्याउने तयारी रहेको प्रमुख प्रशासकीय अधिकृत डाँगीले बताउनुभयो ।
गाउँ सभामा सभाध्यक्षसहित ४७ जना सदस्य सहभागी हुनेछन् ।
