म्यादी प्रहरी हुन तछाडमछाड

नेपालगञ्ज – बाँकेमा म्यादी प्रहरी हुनेको भीड लागेको छ ।
जिल्ला प्रहरी कार्यालय, बाँकेमा म्यादी प्रहरीको फाराम भर्नेको लाइन लागेको हो । बाँके प्रहरी प्रवक्ता डीएसपी मधुसुदन न्यौपानेका अनुसार, बाँकेमा एक हजार ६ सय ८८ जना म्यादी प्रहरी भर्ना गरिदैछ । चैत्र ६ गतेदेखि ११ गतेसम्म फाराम भर्ने अवधि राखिएको छ ।
पहिलो दिन नै एक हजार मानिसले फाराम लगेका छन् । त्यसमा सात जनाको फाराम दर्ता भएको छ । भीडभाड बढी भएकाले सबैको दर्ता गर्न सकिएको थिएन । उनीहरुको आज दर्ता हुने प्रहरीले बताएको छ ।
जिप्रकामा फाराम भर्नेको बाहिरसम्म लाइन देख्न सकिन्छ । बेरोजगारीको समस्या गर्दा म्यादी प्रहरी हुनेको भीड रहेको छ । जिप्रकामा फाराम लिने र दर्ता गर्नेको तछाडमछाड नै देखिन्छ ।