एचपीभी खोपको राम्रो ‘कभरेज’

नेपालगन्ज – बाँकेमा किशोरीको पाठेघरको मुखको क्यान्सरविरुद्धको (एचपीभी) खोप अभियानमा राम्रो ‘कभरेज’ भएको छ ।
स्वास्थ्य कार्यालय, बाँकेका फोकलपर्सन नरेश श्रेष्ठले जिल्लामा एचपीभी खोपमा १००.३५ प्रतिशत प्रगति भएको जानकारी दिए । बाँकेमा माघ २२ गतेदेखि दुई चरणमा गरेर एचपीभी खोप अभियान सञ्चालन गरिएको थियो ।
खोप फोकलपर्सन श्रेष्ठका अनुसार, नेपालगन्ज उपमहानगरपालिकामा ८ हजार २ सय ६२ जनालाई खोप लगाउन लक्षित गरिएकोमा ८ हजार चार सय जनाले खोप लगाएका छन् । यहाँ १०१.६७ प्रतिशत प्रगति भएको छ । खजुरा गाउँपालिकामा तीन हजार २ सय ५३ जना लक्षित संख्या रहेकोमा ५ हजार एक सय जनाले खोप लगाएका छन् । यहाँ १५६.७८ प्रतिशत प्रगति भएको छ । लक्ष्य भन्दा बढी प्रगति हुनुमा बाहिरका किशोरीले खोप लगाएको सम्बद्धले बताएका छन् ।
राप्तीसोनारी गाउँपालिकामा ३ हजार २ सय ११ जना लक्ष्य रहेकोमा ३ हजार १ सय ४१ जनाले खोप लगाएका छन् । बैजनाथ गाउँपालिकामा ३ हजार ९ सय ६८ जनामा ३ हजार ८ सय ३३ जनाले खोप लगाएका छन् । जानकी गाउँपालिकामा २ हजार ४ सय ५ जनामा २ हजार १ सय ७० जना, डुडुवा गाउँपालिकामा २ हजार ३ सय २८ मा २ हजार ३ सय १० जना र नरैनापुर गाउँपालिकामा २ हजार ४ सय ९० मा २ हजार ३ सय ५ जनाले खोप लगाएका छन् ।
बाँकेमा प्रायः अभियानमा कभरेज राम्रो हुँदैन । अझ नेपालगन्जमा खोपको कभरेज रहने गर्दछ । यो एचपीभी खोप भने सबैजसोले लगाएका छन् । ६ देखि १० कक्षा पढ्ने तथा स्कूल बाहिरका १० देखि १४ वर्षसम्मका किशोरीलाई खोप दिइएको थियो ।
स्वास्थ्य कार्यालय, बाँकेका खोप फोकलपर्सन श्रेष्ठले अझै खोप लगाउन छुटेको भएमा भेरी अस्पताल र संस्थागत क्लिनिकमा गएर खोप लगाउन आग्रह गर्नुभयो । ‘खोप लगाउनबाट कोही लक्षित किशोरी छुटेको भए खोप लगाउनका लागि अनुरोध गरेका छौं, खोप फोकलपर्सन श्रेष्ठले भन्नुभयो, फाल्गुन १३ र १४ गते भेरी अस्पताल, संस्थागत क्लिनिकमा १० देखि ४ बजेसम्म गएर खोप लगाउन सक्नुहुन्छ ।’
खोप लगाउन जादा पढिरहेका किशोरीले स्कूल खुल्ने परिचयपत्र र स्कूल बाहिर रहेका किशोरीले जन्मदर्ता वा अन्य प्रमाणपत्र लिएर आउनु पर्दछ । महिलामा हुने विभिन्न क्यान्सरमध्ये पाठेघरको मुखको क्यान्सर महिलाको मृत्युको प्रमुख कारणमध्येमा पर्छ । प्रत्येक दिन चार जना महिलाको पाठेघरको मुखको क्यान्सरबाट मृत्यु हुने एक तथ्यांक रहेको छ ।