ढल व्यवस्थापनका लागि सांसद तिवारीको पहल

नेपालगञ्ज – वर्षाको समयमा नेपालगञ्जकाे मुख्य समस्याको रुपमा रहेको ढल निकासको समस्या समाधानका लागी सांसद लक्ष्मी तिवारीले पहल गर्नु भएकाे छ ।
नेपालगञ्ज नगरभित्रका प्रायः करिब ८० प्रतिशत सडक तथा नालाहरु निर्माण भइसकेको छ । तर नाला निर्माण भएपनि वर्षाको समयमा पानी परेर जम्मा हुने र पानीको निकास थुनिएपछि शहर डुबानमा पर्ने समस्या देखिएकाे छ । नेपालगञ्ज सुर्खेतरोड सडक खण्डअन्र्तगत जिल्ला शिक्षा इकाई कार्यालय नजिक रहेको मुख्य नालाको निकासको चौडाईको अभावमा पानी थुनिएकाले पुलको चौडाई बढाएर निकास फराकिलो बनाउनका लागि सम्वन्धित सरोकारवालासंग पुगेर दबाब दिएको सांसद तिवारीले बताउनुभयो ।
उहाँका अनुसार नेपालगञ्जकाे सुर्खेतरोडस्थित नालाको पुल करिब ८–१० मिटर रहेपनि निकास मात्र ३ मिटर चौडाइ भएकाले पानी थुनिएर समस्या डुबानको समस्या रहेको छ । उक्त समस्याका बारेमा नेपालगञ्ज सेतुविक चोकस्थित होटल व्यवसायी गोपाल गिरीलगायतका स्थानीयले पटक पटक नेपालगञ्ज उपमहानगरपालिका, सडक डिभिजन लगायतसंग आग्रह गर्दा समेत कुनै सुनवाई नभएर आफुसमक्ष यो समस्या आएपछि सांसद तिवारीले यो सवाललाई संघिय सरकारसमक्ष पुर्याउनुभएको छ ।
संसाद तिवारीले भन्नुभयो, “नेपालगञ्ज शहरको मुख्य समस्या ढल निकास र डुबानलाई दिर्घकालिन समाधान गर्नुपर्दछ, त्यसका लागि मेरो पहल पहिलो हुनेछ,” स्थानीयको समस्या लिएर सांसद तिवारीले सडक डिभिजन कार्यालय, क्षेत्रीय सडक डिभिजन, नेपाल सरकार अर्थ मन्त्रालय, भौतिक पूर्वाधार मन्त्रालयसम्म धाएर नाला पुलको चौडाई बढाउनका लागि लाग्ने लागत स्टिमेट तीस लाख बजेट व्यवस्थापन गर्नुभएको छ ।
राष्ट्रिय स्वतन्त्र पार्टीकातर्फबाट प्रतिनिधिसभा सदस्य लक्ष्मी तिवारीले यो समस्यालाई लिएर सडक डिभिजन कार्यालय नेपालगञ्ज प्रमुख निरज शाक्य, अर्थसचिव अर्जुनप्रसाद पोख्रेललगायतसंग भेटेर समस्या राख्दा तत्काल निर्माणकाे कार्य अघि बढाउने सहमति भएको सांसद तिवारीका निजी सल्लाहकार रविन्द्रकुमार ज्ञवालीले बताउनुभयो ।
सल्लाहकार ज्ञवालीका अनुसार, सांसद तिवारीले यस क्षेत्रका विकास निर्माण तथा सार्वजनिक सरोकारको सवाललाई मुख्य प्राथमिकताका साथ उठाएर समाधानका लागि पहल गर्नुहुनेछ भने ती सवालहरुलाई आफनो कार्ययोजनामा समेत समेट्नुभएको छ ।
सांसद तिवारी सम्भवतः चालु आर्थिक वर्षभित्रै उक्त नालाको निर्माण प्रक्रिया शुरु हुनेमा विश्वस्त हुनुहुन्छ । नाला निर्माण विषयमा सडक डिभिजन कार्यालय नेपालगञ्ज प्रमुख शाक्यले उक्त समस्या ठूलो भएको स्वीकार्दै बजेटको अभावमा निर्माण गर्न नसकेको भन्दै सांसद तिवारीको पहलमा बजेट व्यवस्थापन भएपछि तत्काल निर्माण शुरु गर्ने बताउनुभयो ।
वर्षाको समयमा नेपालगञ्जमा केही बेर पानी परेपछि सेतु विक चोक र घरबारीटोल, गणेशपुर, न्युरोडलगायतका स्थानहरु जलमग्न भई घरभित्र समेत पानी भर्ने समस्या रहेको स्थानीय बताउंछन् । सूचना र नागरिक अभियन्ताका रुपमा काम गर्नुभएका सांसद तिवरीले नागरिकसंग प्रत्यक्ष सरोकार राख्ने र सार्वजनिक चासोको विषयलाई मुख्य एजेण्डाको रुपमा अघि बढाउनुभएको छ ।