रोयल नेपालगञ्जलाई प्रथम संघारी भेट्रान कपको उपाधी

नेपालगञ्ज – प्रथम संघारी भेट्रान कप फुटबल प्रतियोगिताको उपाधी रोयल नेपालगञ्ज फुटबल क्लवले जितेको छ ।

नेपालगञ्ज रंगशालामा सञ्चालन भएको प्रतियोगितामा रोयलले मिलन क्लव, नेपालगञ्जलाई ५–१ गोलले पराजित गर्दै उपाधी जितेको हो ।

खेलमा अग्रता मिलनले लिएको थियो । मिलनका क्याप्टेन विक्की लामाले गोल गरेर टीमलाई अग्रता दिएका थिए । गोल खाएपछि आक्रमक बनेको रोयलले पछि गोलको वर्षा नै गरेको थियो । रितेश खड्काले ह्याट्रिक गरे भने विशाल पाण्डेले दुई गोल गरे । मध्यान्तरपछि खेल एकतर्फी भएको थियो ।

प्रतियोगिताको विजेताले २५ हजार र उपविजेताले १५ हजार रुपैया पुरस्कार पाएका छन् । आयोजक एफसी संघारीका अध्यक्ष प्रेमबहादुर थारु, नेपालगञ्ज उपमहानगरपालिका वडा नं. १२ का अध्यक्ष तरुण बज्राचार्य, एन्फा लुम्बिनीका उपाध्यक्ष सूर्यमणि अधिकारी, प्याब्सन नेपालगञ्जका अध्यक्ष एवं युनाइटेड स्कूलका प्रिन्सिपल विकास बज्राचार्य, व्यवसायीहरु माधव अर्याल, किसन गुरुङ, प्रशिक्षक सानु तामाङलगायतले विजेता र उपविजेता टीम, खेलाडी, प्रशिक्षक, व्यवस्थापकलाई पुरस्कार वितरण गरेका थिए ।

प्रथम संघारी भेट्रान कप फुटबल प्रतियोगितामा आठ वटा टीमले भाग लिएका थिए । रोयल नेपालगञ्ज, मिलन क्लव, एफसी संघारीको ए र बी टीम, नेपालगञ्ज प्याब्सन, कोहलपुर प्याब्सन, न्यू डाँफे र एक्स आर्मीले प्रतियोगितामा भाग लिएको थियो । भेट्रान कपमा ३५ वर्षमाथिका खेलाडी सहभागी थिए ।