६१ ग्राम ब्राउनसुगरसहित तीन पक्राउ

नेपालगञ्ज – लागु औषध नियन्त्रण ब्यूरो र जमुनाहा प्रहरीको टोलीले ६१ ग्राम ब्राउनसुगरसहित तीन जनालाई पक्राउ गरेको छ ।

जमुनाहामा जाँच गर्ने क्रममा शनिबार साँझ जसयपुरका मेराज अन्सारीलाई ५० ग्राम ब्राउनसुगरसहित पक्राउ गरिएको छ । लागु औषध नियन्त्रण ब्यूरोका सई सन्जीत केसीको टोलीले अन्सारीलाई पक्राउ गरेको हो । युपी ४० के २६८० नम्बरको मोटरसाइकलमा सवार अन्सारीले हाफ पाइन्टको खल्तीमा ब्राउनसुगर राखेका थिए ।

त्यस्तै, दिउँसो ब्यूरो र जमुनाहा प्रहरीले जुम्लाका दुई जनालाई ११ ग्राम खैरो हेरोइनसहित पक्राउ गरेको छ । क १ प ११९७ नम्बरको मोटरसाइकल चलाएका किसन नेपालीले लगाएको हेल्मेटभित्र खैरो हेरोइन राखिएको थियो । मोटरसाइकलमा पछाडी बसेका अरुण भण्डारीलाई पनि प्रहरीले नियन्त्रणमा लिएको छ ।

सीमावर्ती भारतीय बजार रुपैडिहामा सहजै पाइने लागु औषधी नेपाली कारोबारी र प्रयोगकर्ताले बोकेर ल्याउने गर्दछन् ।