उत्कृष्टलाई मेसिन

नेपालगञ्ज – नेपालगञ्ज उपमहानगरपालिकाले तेस्रो राष्ट्रिय महिला अधिकार दिवस विविध कार्यक्रम सहित बनाएको छ । दिवसको अवसरमा हिमानी कोषको सहयोगमा ११ जनालाई सिलाईकटाई मेसिन उपलब्ध गराइएको छ ।
नेपालगञ्ज उपमहानगरपालिकाले सञ्चालन गरेको सिलाईकटाई तालिममा सहभागी मध्ये उत्कृष्ट भएका ११ जनालाई आइतबार मेसिन उपलब्ध गराइएको हो । नगर प्रमुख डा. धवलशमशेर राणा, उपप्रमुख उमा थापा मगर, कार्यपालिका सदस्य ईन्दिरा शाहीलगायतले मेसिन हस्तान्तरण गर्नुभयो ।
महिलाको सुरक्षा र अधिकार, संकटकालिन व्यवस्थापन हाम्रो सरोकार भन्ने मूलनाराका साथ दिवस मनाएको छ । कोभिड संक्रमणलाई मध्यनजर गर्दै यसवर्षको दिवस मनाइएको उपप्रमुख उमा थापा मगरले जानकारी दिनुभयो । उपमहानगरपालिकाले नगरका विभिन्न ११ मुख्य चौकमा दिवसको ब्यानर राखेको छ ।
नेपाल प्रहरीले थप एकस्थानमा ब्यानर राखेको छ । दिवसको अवसरमा आइतबार विहान जुम प्रविधिमार्फत रेडियो अन्तरक्रिया गरिएको छ । कार्यक्रममा उपप्रमुख मगर, सहायक प्रमुख जिल्ला अधिकारी दीर्घराज उपाध्याय, जिल्ला प्रहरी कार्यालय बाँकेका प्रमुख ओमवहादुर राना, अधिबक्ता सुनीता शर्मालगायतको सहभागिता रहेको महिला, बालबालिका तथा जेष्ठ नागरिक शाखा प्रमुख शोभा शाहले जानकारी दिनुभयो ।