नेका कोभिड–१९ अनुगमन समितिद्वारा ज्ञापन पत्र

नेपालगञ्ज – नेपाली कांग्रेस कोभिड–१९ अनुगमन समिति, बाँकेले शुक्रबार स्थानीय प्रशासन, नेपालगञ्ज उपमहानगरपालिका तथा भेरी अस्पतालमा ज्ञापन पत्र बुझाएको छ ।
कोरोना महामारीको संक्रमण बढदै गइरहेको अवस्थामा बाँके जिल्लामा संक्रमितहरुको लागी आइसोलेसन कक्ष, प्लाज्मा र अक्सिजनको उचित ब्यवस्था गर्न माग गर्दै ज्ञापन पत्र बुझाइएको हो ।
समितिका संयोजक लक्ष्मीनारायण शाहको नेतृत्व टोलीले बाँकेका प्रमुख जिल्ला अधिकारी शिवराम गेलाललाई ज्ञापन पत्र बुझाएको छ ।
कोभिड–१९ संक्रमणका कारण नेपालगञ्ज उपमहानगरपालिका सहित जिल्लावासी त्रासमा बाँचिरहेको अवस्थामा संक्रमण पुष्टि भएका नागरिकको जीवन रक्षार्थ आवश्यक पर्ने सबै ब्यवस्थापन हुन नसकेको विषयमा समितिले गम्भीर चिन्ता रहेको ज्ञापन–पत्रमा उल्लेख छ ।
भेरी अस्पतालको पछिल्लो अवस्थाका विषयमा विभिन्न सञ्चार माध्यममा आइरहेका समाचारहरु प्रति पनि समितिले गम्भीर ध्यानाकर्षण भएको जनाउँदै अस्पताल प्रमुख डा.प्रकाश थापालाई भेटी ज्ञापन पत्र बुझाएको छ ।
नेपाल–भारत सीमाको जमुनाहा नाकामा हेल्थ डेस्कको उचित व्यवस्थापन, नगरमा रहेका अस्पताल तथा स्वास्थ्य केन्द्रमा अक्सिजन सहितको आइसोलेसन र प्लाज्माको अभाव देखिनु गम्भीर विषय रहेको जनाउँदै संक्रमण फैलावटको दरलाई नियन्त्रण तथा न्यूनीकरण गर्न सामाजिक संघ संस्था तथा निजी क्षेत्र लगायतका सरोकारवाला पक्षसँग समन्वय र सहकार्य गर्दै जिल्लावासी सँगै यो क्षेत्रबाट आवतजावत गर्ने यात्रुहरुलाई सुरक्षित राख्न क्वारिन्टिन तथा आइसोलेसनको उचित प्रबन्ध गर्न, गराउन समितिले जोडदार माग गरेको छ ।
कोभिड–१९ महामारीको संक्रमण नियन्त्रणका लागी गरिने हरेक प्रयासमा नेपाली कांग्रेस कोभिड–१९ अनुगमन समिति बाँके सहकार्य तथा सहयोग गर्न सदैव तत्पर रहेको प्रतिवद्धता जनाउँदै नेपालगञ्ज उपमहानगरपालिकाका प्रमुख डा. धवलशमशेर राणालाई समेत भेटी समितिले ज्ञापन–पत्र बुझाएको छ । स्मरण रहोसः कोभिड–१९ नियन्त्रणका लागी गत वर्ष यसै समितिले प्लाज्मा दान, स्वास्थ्य सुरक्षा सामाग्री वितरण लगायतका काम गरेको थियो ।