भेटिएन घाइते बाघ

नेपालगञ्ज – एम्बुलेन्सको ठक्करबाट घाइते भएको बाघ भेटिएको छैन । शनिबार विहान बर्दिया राष्ट्रिय निकुञ्जमा एम्बुलेन्सले पाटे बाघलाई ठक्कर दिएको थियो ।
निकुञ्जका प्रमुख संरक्षण अधिकृत (वार्डेन) विष्णुप्रसाद श्रेष्ठका अनुसार, नेपालगञ्जदेखि पश्चिमतिर जादै गरेको से १ च २४२१ नम्बरको एम्बुलेन्सले पूर्व पश्चिम राजमार्गअन्तर्गत बुढीखोला नजिक बाघलाई ठक्कर दिएको थियो । एम्बुलेन्स चालकले नै निकुञ्ज प्रशासनलाई सोबारेमा जानकारी गराएका थिए ।
वार्डेन श्रेष्ठले घाइते बाघको खोजी गरेपनि नभेटिएको बताउनुभयो । निकुञ्ज, नेपाली सेनाको टोलीले हात्तीको प्रयोग गरेर बाघको खोजी गरेका थिए । निकुञ्ज प्रशासनले एम्बुलेन्स र चालकलाई नियन्त्रणमा लिएको छ ।