४, ५, ६ वर्षका बच्चाले कोरोना जिते

नेपालगञ्ज – बाँकेमा मंगलबार २६ जना डिस्चार्ज भएका छन् ।
कोरोना जितेर घर फर्किनेमा १३ पुरुष र १३ महिला रहेका छन् । जिल्ला स्वास्थ्य कार्यालय, बाँकेका अधिकृत एवं कोरोनाका फोकलपर्सन नरेश श्रेष्ठका अनुसार, चार वर्षकी बच्चीदेखि ७४ वर्षकी बृद्धाले कोरोनालाई जितेका छन् । कोरोना जितेर फर्किनेमा ४, ५ र ६ वर्षका तीन बच्चा छन् ।
असोज १३ गते कोरोना पुष्टि भएपछि उनीहरु कोहलपुर मेडिकल कलेज, भेरी अस्पताल, होटल इन्द्रेणी र होम आइसोलेसनमा बसेका थिए ।
फोकलपर्सन श्रेष्ठले अहिलेसम्म जिल्लामा एक हजार आठ सय ७३ जना डिस्चार्ज भइसकेको जानकारी दिनुभयो । ५ सय ४१ जना आइसोलेसनमा बसेका छन् ।