पीएम कपको तालिका चेन्ज : न्यू डायमण्डको सहज जीत

नेपालगञ्ज – नेपालगञ्जमा जारी प्रधानमन्त्री कप अन्तर्राष्ट्रिय आमन्त्रण महिला भलिबल प्रतियोगितामा न्यू डायमण्डले नेपालगञ्ज–६ लाई सोझो सेट पराजित गरेको छ ।
भलिबलको राष्ट्रिय टीमका कप्तान अरुणा शाही, सलिना श्रेष्ठ सम्मिलित न्यू डायमण्डले ५ नम्बर प्रदेशको नेपालगञ्ज–६ लाई २५–९, २५–१३ र २५–११ को सेटमा पराजित गरेको हो । न्यू डायमण्डले सहजै जीत निकालेको थियो । प्रतिस्पर्धी अलि कमजोर हुँदा डायमण्डका खेलाडीहरु हाँसी हाँसी खेलेको थियो । सर्विस बिग्रिदा पनि हाँसेकै देखिन्थे ।

जीतसँगै न्यू डायमण्ड सेमिफाइनलमा प्रवेश गरेको छ । डायमण्ड यसअघि प्रहरीसँग पराजित भएको थियो । कोरोना भाइरसका कारण भारतीय टीमसमेत नआएपछि प्रतियोगिताको तालिका परिवर्तन गरिएको छ ।

जिल्ला भलिबल संघका अध्यक्ष टीएस ठकुरीले २१ गते नै फाइनल हुने गरी तालिमका बनाएको जानकारी दिनुभयो । अध्यक्ष ठकुरीका अनुसार, २० गते प्रहरी र सेना, एपीएफ र न्यू डायमण्डका बीचमा सेमिफाइनल खेल हुनेछ ।