सिमलघारी, फुटाहा र सटरिया विजयी

नेपालगञ्ज – बर्दियामा दमौली युवा क्लवले आयोजना गरेको क्लवस्तरीय फुटबल प्रतियोगिताको शुक्रबार भएको खेलमा बाँकेको सिमलघारी, बर्दियाको फुटाहा र सटरिया विजयी भएका छन् ।

बाँसगढी नगरपालिका वडा नं. ६, दमौलीमा चलिरहेको फुटबल प्रतियोगितामा सिमलघारीले बोगटियालाई ठूलो गोल अन्तरले पराजित गरेको छ । शिव बस्नेत र सरोज डाँगीको ह्याट्रिकसँगै सिमलघारीले बोगटियालाई ७–० गोलले पराजित गरेको हो । शिवले चार गोल गरेका थिए ।

सटरियाले मैनापोखरलाई ४–१ गोलले पराजित गरेको छ । सटरियाका अर्जुन थापाले ह्याट्रिक गरेका थिए । एक गोल करण शाहीले थपे । मैनापोखराबाट एक गोल आलोक थारुले गरेका थिए ।
अर्को खेलमा फुटाहाले दाङपुर दमौलीलाई ट्राइबेकरमा पराजित गरेको छ ।