किन भयो एक्कासी चक्काजाम ?

नेपालगञ्ज – नेपालगञ्ज–कोहलपुर सडक खण्डमा चक्काजाम गरिएको छ ।
राप्रपा निकट युवक संगठनले नेपालगञ्ज–कोहलपुर सडक खण्डको राँझाचोक अगाडि मनकामना ग्याँस जाने बाटो अगाडि बसेर चक्काजाम गरेको हो । युवाहरुले टायर सडक जाम गराएका थिए ।
गएराती गाइगोरु तस्करी हुन थालेको भन्दै रोक्न पुगेका युवक संगठनका जिल्ला अध्यक्ष हुकुम केसीलगायतमाथि आक्रमण भएको भन्दै चक्काजाम गरिएको थियो । प्रमुख जिल्ला अधिकारी र एसपीले आक्रमणकारीलाई कारबाही गर्ने आश्वासन दिएपछि चक्काजाम खोलिएको युवक संगठनले जनाएको छ । युवक संगठनका केन्द्रीय उपाध्यक्ष ऋषिराज देवकोटाले सम्बोधन गरेर पौने तीन बजे चक्काजाम खुलाएका छन् ।
बाँकेबाट रातीमा गाइगोरु तस्करी भइरहेको भन्दै युवक संगठनले खबरदारी गरिरहेको छ । गएराती पनि दुई वटा ट्रक गाइगोरु लिन आएको भन्दै पिछा गरेका युवाहरुसँग स्थानीयको विवाद भएको थियो । एसपी वलीले अवैधरुपमा गाइगोरु निकासी हुन नदिएको दावी गरिरहनु भएको छ ।