नरैनापुरलाई ग्रामीण सहरका रुपमा बिकास गर्छौं : मन्त्री अथक

नरैनापुर – बाँके क्षेत्र नं. १ का प्रतिनिधि सभा सदस्य उम्मेदवार एवं युवा तथा खेलकुद मन्त्री महेश्वर गहतराज (अथक) ले बाँकेको नरैनापुरलाई ग्रामीण सहरका रुपमा बिकास गरिने बताएका छन् ।

बाम–लोकतान्त्रिक गठबन्धनका साझा उम्मेदवार अथकले आगामी ५ वर्ष भित्र नरैनापुरको मुहार फेरिने बताउँदै जिल्लाको नयाँ सहरका रुपमा नरैनापुरलाई बिकास गरिने बताएका हुन् ।

गठबन्धनका तर्फबाट नरैनापुर गाँउपालिकामा आयोजित चुनावी सभामा बोल्दै माओवादी केन्द्रका स्थायी समिति सदस्य समेत रहेका मन्त्री अथकले आफ्नो पहिलो कार्यकालमा नरैनापुरमा बिकासको जग तयार गरिएकाले आगामी पाँच वर्ष विकासको वर्ष हुने जिकीर गरे । उनले बिगतमा दुर्गम क्षेत्रका रुपमा रहेको नरैनापुरमा बिजुली, सडक पुर्वाधार, नदि नियन्त्रण, बिद्यालय, खानेपानी लगायतका पूर्वाधारहरु निर्माण गरिएको भन्दै अव कृषि, पर्यटन र रोजगारमा जोड दिइने बताए । उनले नरैनापुमा छोटी भन्सार, ईलाका प्रशासन, नापी तथा मालपोतका शाखा कार्यलय स्थपनामा पनि जोड दिइने दावी गरे ।

कृषि उत्पादनको दृष्टिले नरैनापुर उर्वर भूमि भएकाले छरिएर रहेका बस्तीलाई एकिकृत गरी ग्रामीण सहर निर्माण गर्नुपर्ने भन्दै अथकले कृषिजन्य उत्पादन बढाउन र त्यसको बजारीकरणमा सहजता हुने उल्लेख गरे । उनले नरैनापुरलाई कृषि हबका रुपमा बिकास गर्ने प्रतिवद्धता समेत जनाएका थिए ।

कार्यक्रममा बोल्दै प्रदेश सभा सदस्य पदकी उम्मेदवार कृष्णा केसी (नमुना)ले बिगतको कामको आधारमा आफुहरुलाई मत माग्ने अधिकार रहेको भन्दै पुनः अत्याधिक मत दिएर बिजयी गराउन आग्रह गरिन् ।

नेपाली काँग्रेसका केन्द्रिय सदस्य मैकुलाल बाल्मीकीले अथक र नमुना बाहेक अन्य उम्मेदवारले नरैनापुरमा भोट माग्ने नैतिक अधिकार नभएको बताए । उनले संबिधानको रक्षा र बिकासका लागी गठबन्धन गरिएको भन्दै दाँयाबाँया नगरी मतदान गर्न समेत आग्रह गरे ।

कार्यक्रममा नेपाली काँग्रेसका नेता हुर्मत न्यौपाने, पोषण केसी, कृष्ण कार्कीले संकोच नमानी गोलाकार भित्रको हँसिया हथौडामा मतदान गर्न अग्रह गरेका थिए।

चुनावी सभामा माओवादी केन्द्रकी स्थाई समिति सदस्य पूर्णाकुमारी सुबेदी, एकीकृत माजवादीका केन्द्रिय सदस्य अब्दुल हुसेन खाँले पनि गठबन्धनमा दाँयाबाँया गर्ने छुट कसैलाई नभएको भन्दै आगामी सरकार गठबन्धनको बन्ने र यसले बिकास र समृद्धिको नेतृत्व गर्ने दावी गरे ।

सभामा नेपाली काँग्रेसका नेता राम चन्द्र मौर्या, राज कुमार वर्मा, एकिकृत समाजबादीका समानुपातिक उम्मेदवार मौलाना अब्दुल जब्बार मञ्जरी लगायतले गठबन्धनलाई बिजयी गराउन कुनै कसर नराख्ने बताएका थिए । गठबन्धनको चुनावी सभामा उल्लेख्य मात्रामा स्थानीयको सहभागिता रहेको थियो ।