सहकारी घोटालामा १९ जना कसुरदार ठहर

नेपालगञ्ज – सहकारी वित्तिय संस्था लिमिटेड, नेपालगञ्जको घोटाला प्रकरणमा १९ जनालाई कसुरदार ठहर गरिएको छ ।
जिल्ला अदालत, बाँकेका न्यायाधीश इन्द्रबहादुर कठायतको एकल इजलासले १९ जनालाई कसुरदार ठहर गरेको हो । मुद्दामा संलग्न २१ जनालाई सफाई दिइएको छ । ४३ करोड घोटालामा सात जना अहिले पनि कारागारमा रहेका छन् भने ३३ जना धरौटीमा छुटेका थिए । एक जना भने विदेशमा रहेकाले अदालतमा हाजिर भएको छैन ।
बाँके जिल्ला अदालतका श्रेष्तेदार सरोजनिधि वाग्लेका अनुसार, सहकारी रकम हिनामिना, अपचलन, ठगी र संगठित अपराध मुद्दामा ४१ जना प्रतिवादी रहेकोमा १९ जनालाई कसुरदार ठहर गरिएको छ । गंगाधर सुवेदी, गोपाल भण्डारी, अरुणकुमार पाठक, सूर्य विक, लिलाप्रसाद वली, किरण श्रेष्ठ, गौरव श्रेष्ठ, सुरजराम खटिक, बलराम यादव, शारदाकुमारी थापामगर, सिद्दिकुमार महर्जन, अमर खड्का, हरदेवबक्स चौधरी, रविन्द्र थापा, स्थिरमणि बज्राचार्य, तुसार शाह, सन्दीप शर्मा, लिला शाह, ओमप्रकाश चौधरीलाई कसुर ठहर भएको छ ।
कसुर ठहर भएकाहरुलाई एक महिनाभित्र अर्को पेशी तोकेर सजाय निर्धारण गरिने श्रेष्तेदार वाग्लेले बताउनुभयो ।
अदालतले केही निर्देशनात्मक आदेश पनि जारी गरेको छ । जसमा सहकारीको नयाँ तदर्थ समिति गठनदेखि ऋणीबाट असुली गरी त्यो रकम पीडितलाई फिर्ता दिन निर्देशन दिइएको छ । आदेश सुन्न ठूलो संख्यामा जम्मा भएका पीडित धेरै खुशी देखिएनन् । संघर्ष समितिका सहसंयोजक आशुतोष शुक्लाले संगठित अपराधमा कारबाही नगरेर धेरैलाई सफाई दिइएको प्रतिक्रिया दिनुभयो । उहाँले केही दिनमा बैठक बसेर केहीको हकमा अपिलमा जाने बताउनुभयो । २०७६ असोजदेखि निरन्तर मुद्दा चलेको थियो ।