नेपालगञ्ज र कोहलपुरका स्कूलमा विहानी सिफ्ट
नेपालगञ्ज – नेपालगञ्ज र कोहलपुरका विद्यालय विहान सञ्चालन हुने भएका छन् ।
अत्याधिक गर्मीका कारण दश दिन बिदा दिएका स्कूलले अब विहान स्कूल सञ्चालन गर्ने भएका हुन् ।
नेपालगञ्ज उपमहानगरपालिका र कोहलपुर नगरपालिकाले विहान स्कूल सञ्चालन गर्न निर्देशन दिएको छ ।
उपमहानगरपालिकाका शिक्षा महाशाखाका अधिकृत लोकेन्द्र शाहीले ३१ गतेसम्म बिदा रहेको विद्यालयलाई ३२ गतेदेखि विहान सञ्चालन गर्न आग्रह गरेको बताउनुभयो । नेपालगञ्जमा शुरुमा तीन दिन बिदा दिइएकोमा त्यसलाई लम्ब्याइएको थियो ।
उपमहानगरपालिकाले विहान ६.१५ बजेदेखि ११ बजेसम्म स्कूल सञ्चालन गर्न आग्रह गरेको छ ।
त्यस्तै कोहलपुर नगरपालिकाले २२ गतेदेखि ३० गतेसम्म स्कूल बिदा दिएको थियो । ३१ गतेदेखि विहान ६ देखि ११ बजेसम्म स्कूल सञ्चालन गर्न आग्रह गरेको छ ।
