गोविन्द पाण्डेलाई लोकसंस्कृति पुरस्कार

नेपालगञ्ज – कैलाली जनपुस्तकालय, धनगढीले २०७९ को हर्ष–पार्वती लोकसंस्कृति पुरस्कार तातोपानी गाउँपालिका गिडीखोला जुम्लामा जन्म भई हाल चन्दननाथ टोल नेपालगञ्जमा बसोवास गर्ने लेखक तथा लोकसाहित्य अनुसन्धाता गोविन्दप्रसाद पाण्डेलाई प्रदान गर्ने निर्णय गरेको छ । उक्त पुरस्कार फागुन २० गते पुस्तकालयको वार्षिकोत्सवको अवसरमा प्रदान गरिनेछ ।

लेखक पाण्डे विगत दुई दशकदेखि काली कर्णाली क्षेत्रको लोक साहित्य तथा संस्कृतिको अध्ययन अनुसन्धान तथा प्रकाशन क्षेत्रमा सक्रियतापूर्वक निरन्तर लाग्नु भएको छ । पाण्डेले बि.सं. २०६० सालमा काली कर्णालीका जाजरकोटदेखि दार्चुला सम्मका जिल्लाहरुमा स्थलगत भ्रमण गरी खस र डोटेली भाषाका देउडा गीत, भाका, देउडा गायक र देउडाको क्षेत्रमा संलग्न ब्यक्ति तथा संस्थाको गहन अध्ययन अनुसन्धान गरेर देउडा विगतदेखि बर्तमान सम्म नामक पुस्तक समेत प्रकाशन गर्नु भएको थियो ।

पाण्डेले नेपाल प्रज्ञा प्रतिष्ठानको लेखन बृतिमा कर्णालीको लोक साहित्यको अध्ययन समेत गर्नु भएको छ । उक्त कृति हाल प्रकाशोन्मुख अबस्थामा रहेको छ । मधुपर्क, यूवामञ्च, मिर्मिरे, कान्तिपुर, गोरखापत्र लगायत क्षेत्रीय तथा स्थानीय स्तरका पत्रपत्रिका र स्मारिकाहरुमा देउडा, लोकसाहित्य तथा संस्कृति सम्बन्धी लेख रचना समेत प्रकाशन गर्दै आउनु भएको छ ।

हाल जिल्ला हुलाक कार्यालय, बांँकेको कार्यालय प्रमुख पदमा कार्यरत पाण्डे कर्मचारी मिलन केन्द बांँकेको उपाध्यक्ष समेत हुन्् । उनी नेत्रज्योती संघ नेपाल, नेपाल रेडक्रस सोसाइटी, मानव सेवा आश्रम लगायतका संघसंस्था मार्फत समाज सेवामा सकृय रुपमा संलग्न रहेका छन् । पाण्डेलाई नेपाल सरकारले यस वर्षको पचास हजार राशीको निजामती सेवा पुरस्कार समेत प्रदान गरेको थियो ।