मोडेल र न्यू डाँफे क्वाटरफाइनलमा प्रवेश

नेपालगञ्ज – दोस्रो स्व. श्याम थापा स्मृति फुटबल प्रतियोगितामा सोमबार मोडेल क्लब र न्यू डाँफे क्लबले जित हासिल गरेका छन् ।

जितसँगै मोडेल क्लब र न्यू डाँफे क्लब प्रतियोगिताको क्वाटरफाइनलमा प्रवेश गरेका छन् ।

खजुरा गाउँपालिका वडा नम्बर १, मैटहवा मावि सैनिकको खेलको मैदानमा मोडेलले एफसी–११ बर्दियालाई २–१ ले पराजित गरेको छ ।
मोडेलका लागि मनु थापाले दुबै गोल गरेका थिए । उनले १७ औं मिनेट र २३ औं मिनेटमा गोल गरेका थिए । एफसी–११का लागि मोहन विकले ४०औं मिनेटमा गोल गरेका थिए ।

यसैगरी अर्को खेलमा न्यू डाँफे क्लबले रारा जनचेतना युवा क्लबलाई ४–२ गोल अन्तरले पराजित गरेको छ ।
न्यू डाँफेका लागि सुदिप विकले २ गोल गरेका थिए । उनले खेलको ३६औं र ४६औं मिनेटमा गोल गरेका थिए । डाँफेका लागि मनिष थापा र सुनिल खड्काले १–१ गोल गरे । मनिषले ५८औं र सुनिलले ७०औं मिनेटमा गोल गरेका थिए । रारा जनचेतनाका लागि ललित रानामगरले ३४ औं र अशोक सारु मगरले ५५औं मिनेटमा गोल गरेका थिए ।

प्रतियोगिता अन्तर्गत मंगलबारको पहिलो खेलमा एसएसएफए दाङ र सहारा क्लब इन्डियाबिच प्रतिस्पर्धा हुनेछ । यसैगरी समूह (ए) बाट सेमिफाइनलमा प्रवेशका लागि खजुरा युनाइटेड र शान्ति स्पोर्टस क्लबबिच प्रतिस्पर्धा हुनेछ ।