च्याउ खोज्न गएका दुई जनालाई बाघको आक्रमण

नेपालगञ्ज – बाघको आक्रमणमा परेर बर्दियामा दुई जना घाइते भएका छन् ।

बर्दिया मधुवन नगरपालिका वडा नं. ७ का सोम श्रेष्ठ र गुलरिया नगरपालिका वडा नं. १ का राकेश लोधलाई बाघले आक्रमण गरेको हो । बाघको आक्रमणमा परेर घाइते भएका दुवै जनालाई नेपालगञ्जस्थित भेरी अस्पतालमा उपचार भइरहेको छ ।

मधुवन नगरपालिका वडा नं. ७ का वडाध्यक्ष राजेन्द्र हमालका अनुसार, सीमावर्ती जंगलमा च्याउ खोज्न गएका श्रेष्ठ र लोधलाई बाघले आक्रमण गरेको थियो । दुवै जनाले फुत्किन सफल भएका छन् ।

श्रेष्ठको हात र पैताला र लोधको हातमा चोट लागेको छ । वडाध्यक्ष हमालले दुवै घाइतेलाई नेपालगञ्जमा ल्याएका थिए । अस्पताल स्रोतका अनुसार, दुवै जना खतरामुक्त रहेका छन् ।

घटना शुक्रबार अपरान्ह ४.३० बजेको थियो । उनीहरुलाई राती १० बजे भेरी अस्पतालमा ल्याइएको थियो ।