स्व. महेश थापा मेमोरियल फुटसल : बैकर्स र होलसेलर्स विजयी

नेपालगञ्ज – स्व. महेश थापा मेमोरियल कप फुटसल प्रतियोगितामा सोमबार होलसेलर्स र बैकर्सको टीम विजयी भएका छन् ।

नेपालगञ्ज फुटसल मैदानमा भइरहेको प्रतियोगिताको पहिलो खेलमा होलसेलर्सले अटोमोबाइल्सलाई पेनाल्टीमा ५–४ गोल अन्तरले पराजित गरेको हो । निर्धारित समयमा दुवै टीमबाट दुई-दुई गोल भएको थियो ।

होलसेलर्सबाट दुवै गोल आशिष गुरुङले गरेका थिए । अटोमोबाइल्सबाट ज्ञानु अधिकारी र मनिष थापाले एक-एक गोल गरेका थिए । यो खेलमा होलसेलर्सका आशिष गुरुङ म्यान अफ द म्याच भएका छन् । उनलाई व्यवसायी शिवहरि नहर्कीले पुरस्कृत गरे ।

होलसेलर्सका खेलाडी आशिष गुरुङको डकुमेन्टमा शंका गरेर अटोमोबाइल्सले प्रोटेष्ट हालेका छन् । आयोजकले मंगलबार १२ बजेसम्ममा गुरुङको डकुमेन्ट मगाएको छ ।

अर्को खेलमा बैकर्सले सुनचाँदी व्यवसायीलाई पराजित गरेको छ ।

यी दुई टोलीको खेल पनि निर्धारित समयमा दुई-दुई गोलको बराबरीमा टुंगिएको थियो । निर्धारित समयमा बैंकर्सबाट अभिनित सिंह र दिनेश चटौत तथा सुनचाँदीबाट अर्जुन सुनार र सन्तोष विश्वकर्माले गोल गरेका थिए ।

पेनाल्टीमा बैकर्सले ३–२ गोलले बाजी मारेको हो । यो खेलमा बैकर्सका दिनेश चटौत म्यान अफ म्याच भएका छन् । उनलाई व्यवसायी सूर्यमणि अधिकारी र खेलाडी अमरसिंह रौटेलाले पुरस्कृत गरे ।

यी खेलसँगै सेमिफाइनलको समीकरण पूरा भएको छ । सेमिफाइनलमा किराना र होलसेलर्स तथा एमआर र बैकर्सका बीच प्रतिस्पर्धा
हुनेछ । प्रोटेष्ट परेका होलसेलर्सका खेलाडी आशिष गुरुङले कागजात देखाउन नसकेमा अटोमोबाइल्सको टीम सेमिफाइनलमा पुग्ने बताइएको छ ।