डुडुवाका सबै नागरिकको स्वास्थ्य विमा
डुडुवा – बाँके डुडुवा गाउँपालिकाले पहिलो पटक सबै नागरिकहरुको स्वास्थ्य विमा गर्न शुरु गरेको छ । घरघरमा स्वास्थ्य सेवा अभियान अन्तर्गत हरेक नागरिकको विमा गरि बढीमा दुई लाखसम्मको उपचार सेवा प्रदान पालिकाले जनाएको छ ।
प्रति परिवार सात सयका दरले पारिवारिक संख्याका आधारमा विमा गरिनेछ । गाउँपालिकाले लिएको लक्ष्य अनुसार हाल ५० प्रतिशत गाउँपालिकाले सहयोग गर्ने र ५० प्रतिशत रकम स्वयम् विमाकर्तालाई बुझाउनुपर्ने डुडुवा गाउँपालिका स्वास्थ्य शाखा प्रमुख धनबहादुर बुढाले बताउनुभयो । प्रतिपरिवारले एक वर्षमा २० हजार बराबरको निशुल्क औषधी उपचार सेवा पाउनेछ ।
विमाका लागि डुडुवा वार्ड नं १ देखि ६ वडासम्म ६ जनालाई विमा सहायकमार्फत नागरिकहरुको विवरण संकलन गरि विमा गर्नका लागि ति कर्मचारीलाई इन्ड्रोवइट मोबाइल सेट, झोला तथा स्टेश्नरीका सामाग्री हस्तान्तरण गरिएको छ ।
सामाग्री हस्तान्तरण गर्दै गाउँपालिका अध्यक्ष नरेन्द्रकुमार चौधरीेले डुडुवामा बसोबास गर्ने अधिकांश नागरिकको आर्थिक अवस्था कमजोर भएकाले विरामी भएपछि उपचार गर्न नसक्ने जनताको विमामार्फत उपचार सेवा प्रदान गर्न सहज हुने बताउनुभयो । उहाँले डुडुवाका नागरिकको घरघरमा सेवा प्रदान गर्ने लक्ष्य अनुसार कुनै पनि नागरिक स्वास्थ्य सेवाबाट बञ्चित नहुन् भनेर यो अभियान शुरु गरेको र गाउँपालिकामै विशेषज्ञ सेवामार्फत उपचार गर्ने बताउनुभयो ।
गाउँपालिकाले ७० वर्ष पुगेका जेष्ठ नागरिक तथा अपांगता भएकाहरुको निशुल्क विमा गरेको छ भने अन्य मानिसहरुको ५० प्रतिशत सहयोग गरेको छ । पहिलो पटक डुडुवाले स्वास्थ्य विमा कार्यक्रम ल्याएको छ ।
डुडुवाले जेष्ठ नागरिकहरुका लागि छुट्टै अस्पताल निर्माण गरिरहेको छ । उक्त अस्पतालमार्फत विशेषज्ञ चिकित्सक, ल्याब, एक्सरे सेवा, फार्मेसी लगायतको सेवा प्रदान गर्ने गरि तयारी भइरहेको गाउँपालिकाले जनाएको छ ।
