ब्राउनसुगरसहित चार जना पक्राउ

नेपालगञ्ज – बाँके प्रहरीले ठूलो मात्रामा लागु औषधी ब्राउनसुगरसहित चार जनालाई नियन्त्रणमा लिएको छ ।
प्रहरीले नेपालगञ्जको न्यूरोडस्थित सन्ध्या नास्ता पसलबाट तीन महिला र एक जना पुरुषलाई १२ ग्राम २ सय मिलिग्राम ब्राउनसुगरसहित पक्राउ गरेको जनाएको छ । पक्राउ पर्नेमा खजुराका बिबा शाही, गंगा खड्का, नेपालगञ्जका राजेश खटिक र बर्दिया राजापुरका पूजा परियार रहेका छन् ।
नास्ता पसलमा ब्राउनसुगरको कारोबार भइरहेको छ भन्ने विशेष सूचना पाएपछि पुगेको प्रहरीले खानतलासी गर्दा तीन महिला र एक पुरुषको साथबाट ब्राउनसुगर बरामद भएको जानकारी दिएको छ ।
प्लाष्टिकमा ५६ वटा पुडिया बनाएर राखिएको ब्राउनसुगरसहित उनीहरुको साथबाट एक चालिस हजार पाँच सय रुपैया बरामद भएको छ ।
निषेधाज्ञाका बीचमा पनि नेपालगञ्जमा ब्राउनसुगरको कारोबार भइरहेको प्रहरीले पटक–पटक बरामद गरेका घटनाहरुले देखाइरहेका छन् ।