प्रहरीको आँखा झिमिक्क, संक्रमित मिलिक्क

नेपालगञ्ज – बाँकेको जोगागाउँ आइसोलेसन सेन्टरमा रहेका एकजना कोरोना संक्रमित भागेका छन् ।
जोगागाउँ स्कूलमा बनाइएको आइसोलेसन सेन्टरमा नेपालगञ्ज–१२ का एकजना र जानकीका ४० जनालाई राखिएको छ । त्यहीमध्येका एकजना विहान चार बजे भागेका छन् । विहान दिसा गर्न भीडभाड रहेको बेलामा ती व्यक्ति बाहिर निस्केको बाँके प्रहरी प्रमुख एसपी वीरबहादुर ओलीले जानकारी दिनुभयो ।
‘एकजना बाहिर निस्केका छन् । हामीले उसलाई खोज्दैछौं, एसपी ओलीले भन्नुभयो, त्यतै कतै होला । आइहाल्छ ।’
जोगागाउँबाट भागेका व्यक्ति नेपालगञ्जका भएको बुझिएको छ । जिल्लामा सय बढी क्वारेन्टाइन छन् । सबै क्वारेन्टाइन वा आइसोलेसन सेन्टर स्कूलमा छन् । सबै स्कूलका पर्खाल छैनन् । यस्तोमा प्रहरीलाई सुरक्षा गर्न गाह्रो भएको छ ।