सेनाको गाडीले ठक्कर दिंदा एक जनाको मृत्यु

नेपालगञ्ज – नेपाली सेनाको गाडीले ठक्कर दिंदा कोहलपुरमा एकजनाको मृत्यु भएको छ । दुर्घटनामा अर्का एकजना घाइते भएका छन् ।
बा १ झ ६३४१ नम्बरको सेनाको गाडी र भे ४ प ७६२० नम्बरको मोटरसाइकल कोहलपुरको एनटीभी चोकमा ठोक्किदा मोटरसाइकल चालक किरण भूसालको मृत्यु भएको हो । मोटरसाइकलमा सवार प्रतिक्षा भूसाल घाइते भएकी छन् ।
इलाका प्रहरी कार्यालय, कोहलपुरका अनुसार, घाइते प्रतिक्षाको मेडिकल कलेज कोहलपुरमा उपचार भइरहेको छ । प्रहरीले सेनाको गाडी र चालकलाई नियन्त्रणमा लिएको छ । मोबाइल गस्तीमा रहेको सेनाको गाडी नेपालगञ्जतर्फबाट आइरहेको थियो ।