अपहरण गरेर जग्गा पास !

नेपालगञ्ज – नेपालगञ्जका नारायण सोनीलाई प्रहरीले पक्राउ गरेको छ ।
अपहरण तथा अपराधिक लाभमा उजुरी परेपछि प्रहरीले फूल्टेक्राका सोनीलाई पक्राउ गरेको हो । केही दिनअघि मात्रै बढै थरका व्यक्तिले सोनीलगायत विरुद्ध उजुरी गरेका थिए । सोनीलगायतको समूहले अपहरण गरेर जग्गा पास गरेको आरोप लगाइएको छ । बाँके प्रहरीले घटनाका बारेमा अनुसन्धान भइरहेको जनाएको छ । ‘घटना गम्भीर छ । हामीले एकजनामात्रै पक्राउ गर्न सफल भएका छौं । अरु पनि छन्, बाँके प्रहरी स्रोतले भन्यो ।
उजुरीमा रहेकामध्येमा पक्राउ पर्ने सोनी पहिलो हुन् । अरुलाई प्रहरीले खोजी गरिरहेको छ । स्रोतले भनेजसरी सोनीलगायतले अपहरण गरेर जग्गा पास गरेका हुन् भने मिलोमतोमा धेरै तातिन सक्ने आकलन गरिएको छ । यसअघि नेपालगञ्जमै मन्दिर र सिक्टा सिंचाईको कार्यालय परिसरको जग्गा मिलोमतोमा व्यक्तिको नाममा पास गर्दा दर्जनबढी मालपोतका कर्मचारीनै जेल पुगेका थिए ।
पक्राउ परेका सोनीको हकमा उजुरी वास्तविक हो कि होइन भन्ने सुक्ष्म अनुसन्धान गरिरहेको प्रहरीको भनाई छ । सोनीलाई फूल्टेक्राबाटै पक्राउ गरिएको थियो ।