विद्यालय बन्द भएनन्

नेपालगञ्ज – नेपालगञ्जका विद्यालय सञ्चालनमा रहेका छन् । नेपालगञ्ज उपमहानगरपालिकाको शिक्षा शाखाले जाडो बिदा दिन निर्देशन गरेपनि परीक्षा चलिरहेकाले यहाँका विद्यालयहरु बन्द भएका छैनन् ।
प्याब्सन नगर अध्यक्ष विकास बज्राचार्यले परीक्षा सकिने बित्तिकै जाडो बिदा दिइने जानकारी दिनुभयो । ‘नगरपालिकाले विद्यालय बन्द गर्न निर्देशनात्मक सूचना दिएको छ । हाम्रो परीक्षा चलिरहेकाले विद्यालय बन्द गर्न सकेका छैनौ, परीक्षा सकिने बित्तिकै जाडो बिदा दिन्छौं, नगर अध्यक्ष एवं युनाइटेड एजुकेशनल एकेडेमीका प्रिन्सिपल बज्राचार्यले भन्नुभयो, परीक्षा आधामा कसरी बिदा दिनु ?’
चिसो बढेपछि नगरपालिकाको शिक्षा समितिले १५ देखि १८ गतेसम्म विद्यालय बन्द गर्न निर्देशनात्मक सूचना जारी गरेको थियो । नेपालगञ्जमा मंगलबार विहानैदेखि घाम देखिएको छ । अरु दिनको तुलनामा चिसो कम रहेको छ ।