स्वास्थ्यमन्त्रीको बिहानै नेपालगन्जमा प्रातकालिन हिडाई

नेपालगन्ज – स्वास्थ्यका लागि प्रातकालिन हिडाई भन्ने मूल नाराका साथ शनिबार बिहान नेपालगन्जमा प्रातकालिन हिडाई (वाकाथन) आयोजना गरिएको छ ।
नेपाल चिकित्सक संघ, भेरी शाखा नेपालगन्जको आयोजना र बरिष्ठ बालरोग विशेषज्ञ डा. किशोर खत्रीको संयोजनमा गणेशमानचोकदेखि वीपीचोक हुँदै वीरेन्द्रचोकमा पुगेर पुनः गणेशमानचोकमा पुगेर कार्यक्रम समापन गरिएको छ ।
बिहान साढे ७ बजे स्वास्थ्य तथा जनसंख्यामन्त्री प्रदीप पौडेलले वाकाथनको उद्घाटन गरेका थिए । सो क्रममा मन्त्री पौडेलले बिहान हिड्दा शरीरमा रोग नलाग्ने भएकाले सबै जनालाई बिहान केही समय हिड्नु सम्झाए । उनले मान्छेले सबैभन्दा बढी आफ्नो शरीरलाई माया गर्ने र त्यो शरीरलाई केही हुन नदिन बिहान हिड्ने र खानपानमा ध्यान दिनु पर्ने बताए ।
मन्त्री पौडेल आफै पनि वाकाथन हिडे । प्रहरीको ब्याण्ड टोलीसहित अपाङ्गता भएका व्यक्ति ह्वीलचियरमा अगाडि–अगाडि थिए भने यहाँका प्रहरी प्रशासन, चिकित्सक, नागरिक समाजका अगुवा वाकाथनमा सहभागी भए ।
कार्यक्रम संयोजक बरिष्ठ बालरोग विशेषज्ञ डा. खत्रीले स्वास्थ्य सचेतना विस्तार गर्न, नेपालगन्जको पर्यटकीयस्थलको प्रवद्र्धन गर्न र आम नेपाली दाजुभाई दिदीबहिनलाई एकताको मालामा गाँस्ने उद्देश्यले वाकाथन आयोजना गरिएको बताए । दाङका डा. खत्री वाकाथनलाई अभियानको रुपमा लिएर हिडेका छन् ।