स्ववियु निर्वाचन : दुईमा जित, महेन्द्रमा पनि अनेरास्ववियुकाे अग्रता

नेपालगन्ज – बाँकेकाे तीन वटा क्याम्पसमा भएकाे स्ववियु निर्वाचनमा एमालेनिकट अनेरास्ववियुले दुई वटामा जीत निकालेकाे छ भने एउटामा अग्रता लिइरहेकाे छ ।
खजुरास्थित ज्ञानाेदय पब्लिक बहुमुखी क्याम्पसमा अनेरास्ववियुका सर्विन महताेले विजयी भएका छन् । यहाँ अनेरास्ववियु र नेविसंघकाे गठबन्धन थियाे ।
नेपालगन्जकाे नर्सिङ क्याम्पसमा अनेरास्ववियुकी देर्वाचना अधिकारीकाे प्यानललै विजयी भएकाे छ । याे क्याम्पसमा अनेरास्ववियु र नेविसंघकाे प्रतिस्पर्धा थियाे ।
पश्चिमकै ठूलाे र चर्चित महेन्द्र बहुमुखी क्याम्पसमा यतिबेला मतगणना भइरहेकाे छ ।
४ हजार ६ सय ६० मतदाता रहेकाे महेन्द्रमा एक हजार ६ सय ९८ मत खसेकाे छ । अहिलेसम्म अनेरास्ववियुका केशरजंग शाहले २ सय ८३, क्रान्तिकारीका हरेन्द्रबहादुर विकले २ सय ७ र नेविसंघका सन्ताेष रावलले १ सय ६९ मत ल्याएका छन् । अन्य पदमा पनि अनेरास्ववियुकै अग्रता रहेकाे छ ।