बाँकेमा ३६ हजार किशोरीलाई एचपीभी खोप लगाउँदै
नेपालगन्ज – बाँकेमा ३६ हजार किशोरीलाई पाठेघरको मुखको क्यान्सरविरुद्धको एचपीभी खोप लगाउन शुरु गरिएको छ ।
स्वास्थ्य कार्यालय, बाँकेका अनुसार, ६ देखि १० कक्षा पढ्ने ९ हजार ४७ र विद्यालय बाहिरका १० देखि १४ वर्षका २७ हजार ९ सय ३ गरी ३६ हजार ९ सय ५० जना किशोरीलाई पाठेघरको मुखको क्यान्सरविरुद्धको एचपीभी खोप लगाउन शुरु गरिएको हो । जिल्लाका आठ वटा पालिकालाई दुई चरणमा विभाजन गरेर एचपीभी खोप लगाउन शुरु गरिएको छ ।
माघ २२ देखि फाल्गुन ६ गतेसम्म खोप लगाइदैछ । पहिलो चरणमा आजदेखि नेपालगन्ज उपमहानगरपालिका, कोहलपुर नगरपालिका, खजुरा र जानकी गाउँपालिकामा खोप लगाउन शुरु गरिएको छ ।
स्वास्थ्य कार्यालय, बाँकेका फोकलपर्सन नरेश श्रेष्ठले पहिलो दिन नेपालगन्जमा २ हजार ७७ जनालाई खोप लगाएको जानकारी दिए । नेपालगन्जमा ९ हजार ३ सय १९ जनालाई खोप लगाउने लक्ष्य रहेको छ ।
कोहलपुर नगरपालिकामा ७ हजार ४ सय ४८ जनालाई खोप लगाउने लक्ष्य रहेकोमा पहिलो दिन आज एक हजार ५ सय ७४ जनालाई खोप लगाइएको छ । खजुरामा ५ हजार ८ सय ७२ मध्येमा ९ सय ३४ जना तथा जानकी गाउँपालिकामा एक हजार नौ सय ५० जनामध्ये पहिलो दिन ४ सय २९ जनालाई खोप लगाइएको छ ।
यी चार पालिकामा २४ हजार ५ सय ८९ जनालाई खोप लगाइदैछ । पहिलो दिन ५ हजार १४ जनालाई खोप लगाइएको छ । जुन २१ प्रतिशत हुन आउँछ ।
दोस्रो चरणमा राप्तीसोनारी, बैजनाथ, डुडुवा र नरैनापुर गाउँपालिकामा खोप लगाउने रणनीति बनाइएको छ । दोस्रो चरणमा १२ हजार ३ सय ६१ जनालाई खोप लगाउने स्वास्थ्य कार्यालयले जानकारी दिएको छ ।
महिलामा हुने विभिन्न क्यान्सरमध्ये पाठेघरको मुखको क्यान्सर महिलाको मृत्युको प्रमुख कारणमध्येमा पर्छ । प्रत्येक दिन चार जना महिलाको पाठेघरको मुखको क्यान्सरबाट मृत्यु हुने एक तथ्यांक रहेको छ ।
एचपीभी खोप अभियानका लागि जिल्लामा ५ सय २४ वटा खोप केन्द्र बनाइएको छ । एक हजार ४८ जना स्वयंसेवक र ५ सय २४ जना स्वास्थ्यकर्मी परिचालन गरिएको छ । भवितब्य केही हुन सक्ने भन्दै ४१ जना चिकित्सकलाई तयारी अवस्थामा राखिएको छ ।
स्वास्थ्य कार्यालयले १३ प्रकारका रोगविरुद्ध ९ प्रकारको खोप लगाउने गर्दछ । विभिन्न अभियानहरुमा जिल्लाको कभरेज फितलो हुने गर्दछ । स्थानीयले भ्याक्सिनको बारेमा नकारात्मक धारणा बनाइदिंदा अभियानमा त्यसको प्रभाव पर्ने गर्दछ । जस्तो, हात्तीपाइले अभियानको शुरुवाती वर्षमा परेको नकारात्मक धारणाले गर्दा ६ वर्षसम्ममा सम्पन्न हुनु पर्ने अभियान १४ वर्षसम्म लम्बिरहेको छ ।
बजारमा कम्तीमा ६ हजार ५ सय रुपैया बढीमा पाइने यो खोप सरकारले निशुल्क दिइरहेकाले त्यसको भरपुर फाइदा लिन स्वास्थ्य कार्यालय, बाँकेले आव्हान गरेको छ ।