पूर्वराजा सपरिवार नेपालगन्ज आउँदै

नेपालगन्ज – पूर्वराजा ज्ञानेन्द्र शाह सपरिवार नेपालगन्ज आउने भएका छन् । साविकको मध्य र सुदूरपश्चिमका विभिन्न जिल्लाको भ्रमणको सिलसिलामा पूर्वराजा शाह नेपालगन्ज आउन थालेका हुन् ।
सोमबार अपरान्ह पूर्वराजा सपरिवार नेपालगन्ज आउदा भब्य स्वागत गर्ने गरी हिन्दुवादी र राजावादीले तयारी गरेका छन् । नेपालगन्ज विमानस्थलबाट बासस्थान सोल्टीसम्म नाराबाजीका साथ स्वागत गर्ने तयारी रहेको राप्रपाका सहायक महामन्त्री ऋषिराज देवकोटाले बताए ।
पूर्वराजपरिवारका सदस्य नेपालगन्जमा एक महिनाबढी बस्ने बताइएको छ । नेपालगन्जमा मुकाम बनाएर पूर्वराजाको विभिन्न जिल्लामा सवारी हुने देवकोटाले बताए । पूर्वराजपरिवारका सदस्य वर्षेनीजसो नै नेपालगन्जमा लामै बस्ने गरी आउने गर्दछन् । यसअघिको नेपालगन्ज बसाईका क्रममा पूर्वराजा शाहले भारत उत्तरप्रदेशका मुख्यमन्त्री आदित्यनाथलाई समेत भेटेका थिए ।