म्याराथनलाई अझ बृहत गराउने प्रतिबद्धता

नेपालगञ्ज – पाँचौं धारा नेपालगञ्ज म्याराथनका सहयात्रीहरुले आगामी वर्ष अझ ‘बृहत’ गर्ने प्रतिबद्धता गरेका छन् ।
क्रियटिभ ह्याण्डसले शुक्रबार सहयोगीदातालाई गरेको सम्मान कार्यक्रममा उनीहरुले आगामी वर्ष अझ बृहत गराउन आफ्नो तर्फबाट सहयोग बढाउने प्रतिबद्धता गरेका हुन् । सरकार र तत्कालिन विद्रोह माओवादीका बीचमा मंसीर ५ गते भएको बृहत शान्ति सम्झौताको सम्झना गर्दै नेपालगञ्ज म्याराथन गरिदै आएको छ । यो वर्ष शनिबार पार्न मंसीर ७ गतेलाई रोजिएको थियो । धारा तेल प्रमुख प्रायोजक रहेको म्याराथनले सहयोगीदातालाई उत्साहित बनाएको छ । दुई हजार सात सय बढी मानिस नेपालगञ्जको सडकमा दौडिदा ‘पार्टनर’हरु खुशी भएका हुन् ।
प्रदेश सांसद कृष्णा केसीले नेपालगञ्जको पहिचान बढाउन नेपालगञ्ज म्याराथनले ठूलो भूमिका खेलेको बताउनुभयो ।

नेपालगञ्ज उपहानगरपालिकाका उपमेयर उमा थापाले आगामी वर्ष शीर्षक नै छुट्याएर सहयोग गर्ने प्रतिबद्धता गर्नुभयो ।
केएल दुग्गडका महाप्रवन्धक प्रदीप छाजेडले दुई वर्षका लागि सम्झौता गरेको भएपनि अझै निरन्तरताका लागि पहल गर्ने बताउनुभयो । उहाँले म्याराथन आफूले सोचेको भन्दा धेरै राम्रो भएको बताउनुभयो ।
राष्ट्रिय बाणिज्य बैंकका प्रदेश प्रमुख आनन्द सुवेदी, आशिर्वाद पेन्टसका किरण गिरी, कैलपालका सञ्जय सिंह, हिसानका डा. अवनेन्द्र मिश्र, गोर्खा स्कूलका केशर आलेले नेपालगञ्ज म्याराथनलाई बृहत्तर गराएर लैजादा नेपालगञ्जको ‘इज्जत’ बढ्ने बताउनुभयो ।
पहिलो वर्ष ३ सय ५० जना दौडेको नेपालगञ्ज म्याराथनमा पाँचौं संस्करणमा आइपुग्दा दुई हजार सात सय दौडेका छन् । आगामी वर्ष नेपालगञ्ज म्याराथनलाई अन्तर्राष्ट्रिय स्तरको बनाउन लागि परेको क्रियटिभ ह्याण्डसका अध्यक्ष टीएस ठकुरीले बताउनुभयो । पाँचौं संस्करणमा सहयोग गर्ने सबैलाई सम्मान गरिएको थियो ।