११३ नम्बर कोठामा रेडपाण्डाको छाला

नेपालगञ्ज – बाँके प्रहरीले लोपोन्मुख वन्यजन्तु रेडपाण्डाको छालासहित तीन जनालाई पक्राउ गरेको छ ।
जिल्ला प्रहरी कार्यालय, बाँकेका अनुसार, सुर्खेतका दलबहादुर शाही, जाजरकोटका धनबहादुर शाही र सल्यानका भरतबहादुर पुनलाई प्रहरीले दुई थान रेडपाण्डाको छालासहित पक्राउ गरेको हो ।
विशेष सूचनाका आधारमा पुगेको प्रहरीले कोहलपुर चप्परगौडीको दैलेखी होटलको ११३ नम्बर कोठाबाट रेडपाण्डाको छालासहित तीन जनालाई पक्राउ गरेको थियो । उनीहरुले झोलामा लुकाएर रेडपाण्डाको छाला राखेका थिए । प्रहरी रेडपाण्डासहित उनीहरुलाई थप अनुसन्धान तथा कारबाहीको लागि बाँके राष्ट्रिय निकुञ्ज कार्यालय पठाइदिएको जनाएको छ ।