नरैनापुरमा योग शिविर

नरैनापुर – ´गरौं योग । रहौ निरोगी´ भन्ने नाराका साथ नरैनापुरमा एक दिने योग शिबिर तथा स्वास्थ्य परीक्षण शनिबार सम्पन्न भएको छ ।

स्वास्थ्य सम्बन्धि जानकारी दिने उद्देश्यले नरैनापुर गाँउपालिकाको आयोजनामा भएको शिबिरमा सहभागीहरुलाई योग गुरु गिरिराज भट्टराईले प्रशिक्षण दिनु भएको थियो ।
शिबिरको समापन गर्दै नरैनापुर गाँउपालिका अध्यक्ष इश्तियाक अहमद शाहले नेपालमा दिनानुदिन रोगीहरुको संख्या बढ्दै गइरहेको सन्दर्भमा योगका माध्यमबाट रोग नियन्त्रण गर्न सहयोग मिल्ने बताउनु भयो । उहाँले मानसिक तनाब कम गर्न योग सबैले गर्नु आवश्यक रहेको बताउदै योग गर्न पालिकाले योग समितिसंग सहकार्य गरी अगाडि बढ्ने बताउनु जिकिर गर्नु भएको थियो ।

उहाँले योग गर्दा शरीर लचिलो बन्ने मात्रै नभइ मन र मस्तिष्क स्वस्थ हुने बताउनु भयो । उहाँले योग गर्न नसक्दाको असर हाम्रो जीवन, कार्यक्षमतामा परिरहेको पनि बताउनु भएको  थियो ।

योग गुरु गिरिराज भट्टराईले भन्नुभयो,योगाभ्यास गरेमा मन चंगा र शरीर फुर्तिलो हुन्छ । मानिसको विचार, चालचलन, भोजनशैली, आचरण आदिमा सकारात्मक परिवर्तन आउँछ । मानिसमा असल चरित्र, गुण, चिन्तनको विकास हुन्छ । उसले लोककल्याणकारी काम गर्दछ । योगको अभ्यास गरी यसमा निपुण भएका साधकहरूलाई योगी भन्ने गरिएको हो । योगले मन र शरीरलाई स्वस्थ र फुर्तिलो बनाउनुका साथै असल चरित्रवान् व्यक्तित्वको निर्माण गर्ने भएकोले नरैनापुरवासीलाई योग अभ्यास गर्न आग्रह गर्नु भएको थियो ।

कार्यक्रममा नरैनापुरका स्वास्थ्य संयोजक नागेन्द्र कुमार शाह, योगाका प्रशिक्षकहरु सुमित्रा सुबेदी, संगिता शर्मा, निर्मला शाह लगायतले योगको माध्यमबाट आम नागरिकको स्वास्थ्य स्थितिमा सुधार गर्न योग समितिले काम गर्ने विश्वास व्यक्त गर्नुभएको थियो ।

शिबिरमा वडा नं. १ का अध्यक्ष इसाक जोलाह, वडा नं. ३ का अध्यक्ष अजय मिश्रा, योग समिति नेपालका पदाधिकारी, गाँउपालिकाका कर्मचारीहरुको सहभागिता रहेको थियो । योग शिबिरमा सहभागि ५३ जनाको स्वास्थ्य परीक्षण गरिएको स्वास्थ्य संयोजक शाहले जानकारी दिनु भयो ।

यसैगरी शिबिर कै क्रममा भरत महतोको संयोजकत्वमा ७ सदस्य योग समिति नरैनापुर शाखाको गठन गरिएको छ । समितिमा डा.सूर्य प्रकाश शाह, डा. गोपाल तिवारी, नागेन्द्र शाह, नबिन बुढा, रुपवरन यादव र माधव अधिकारी रहनु भएको छ । योग शिविरमा सहभागि हुन नरैनापुर पुगेका योग समितिका पदाधिकारीहरुलाई नरैनापुर गाँउपालिका अध्यक्ष शाहले खादा लगाएर स्वागत गर्नु भएको थियो ।