स्व. महेश थापा मेमोरियल फुटसलको उपाधी अटोमोबाइल्सलाई

नेपालगञ्ज – नेपालगञ्जमा सञ्चालन भएको स्व. महेश थापा मेमोरियल कप फुटसल प्रतियोगिताको उपाधी अटोमोबाइल्सले जितेको छ ।

न्यूरोडमा रहेको नेपालगञ्ज फुटसल मैदानमा भएको खेलमा अटोमोबाइल्सले बैकर्सलाई ४–१ गोलले पराजित गर्दै उपाधी जितेको हो । अटोमोबाइल्सका मनिष थापा र हेमन्त वलीले दुई-दुई गोल गरे । बैकर्सका तर्फबाट अविनित सिंहले एक गोल गरे ।

खेल शुरु भएको केही मिनेटमै बैकर्सका खेलाडीको डीएरियाभित्र ह्याण्ड भएपछि अटोमोबाइल्सले पेनाल्टी पाएको थियो । त्यसलाई मनिष थापाले गोलमा परिणत गरेपछि बैकर्स दबाबमा आएको थियो । मध्यान्तर लगत्तै एक जना खेलाडीले रातो कार्ड पाएपछि बैकर्स चार जनामा सीमित भएको थियो । जसको फाइदा उठाउदै अटोमोबाइलसले लगातार दबाबमा राख्यो र गोल संख्या बढाउदै उपाधी जित्यो । फाइनल खेलको म्यान अफ द म्याच अटोमोबाइल्सका हेमन्त वली भए ।

उपाधी जितेसँगै अटोमोबाइल्सले ३१ हजार, ट्रफी, मेडल र सर्टिफिकेट पुरस्कार पायो । दोस्रो भएको बैकर्सले २१ हजार, ट्रफी, मेडल र सर्टिफिकेट पाएको छ ।

आठ टीमले भाग लिएको प्रतियोगितामा चार गोल गर्दै अटोमोबाइल्सका मनिष थापा उच्च गोलकर्ता भए । प्रतियोगिताको उत्कृष्ट खेलाडी बैकर्सका दिनेश चटौत, उत्कृष्ट गोलकिपर अटोमोबाइल्सका कौशल पाण्डे, उत्कृष्ट प्रशिक्षक अटोमोबाइल्सका अमृत श्रेष्ठ र अनुशासित टीमको पुरस्कार जुत्ता चप्पल टीमले पायो ।

प्रथम, द्वितिय, विधागत उत्कृष्ट, टाइटल स्पोन्सर, स्पोन्सर, अफिसियल टीमलाई आयोजक मनिष थापाका श्रीमती दिपा थापा, अन्टी तुलसा थापा, अतिथिहरु सविन घिमिरे, किसन गुरुङ, सन्तोष पौडेललगायतले पुरस्कार वितरण गरे ।