सिमलको हाँगाले लाग्दा एकजना बेहोस्

नेपालगञ्ज – हावाहुरी चलेको समयमा सिमलको हाँगा खसेर लाग्दा कोहलपुरमा एकजना गम्भीर घाइते भएका छन् ।
गएराती ८.३५ बजे हावाहुरी चलेको बेला सिमलको हाँगा खसेर लाग्दा कोहलपुर–१२, निबुवाका २१ वर्षीय कमल शाही गम्भीर घाइते भएका हुन् । बाटोमा हिडिरहेका बेला सिमलको हाँगा खसेर शाहीको टाउकोमा लागेको थियो । मेडिकल कलेज, कोहलपुरको आइसीयू कक्षमा उपचार भइरहेका शाही बेहोस् छन् ।
इलाका प्रहरी कार्यालय, कोहलपुरका डीएसपी कुलदिप चन्दका अनुसार, सिमलको हाँगा पहिला रोकिरहेको ना ४ ख ९४१ नम्बरको ट्रकमा खस्यो । त्यसपछि उछिटिएर खस्दा बाटोमा हिडिरहेका शाहीको टाउकोमा लाग्यो ।
हावाहुरीले केहीको घरको छाना उडाएको छ । बाँके प्रहरीमा त्यस्तो खबर आइरहेको छ । बाँके प्रहरी प्रवक्ता डीएसपी शिवबहादुर सिंहले क्षतिको विवरण लिने काम भइरहेको जानकारी दिनुभयो ।